काठमाडौं। पूर्वराष्ट्रपति विद्यादेवी भण्डारी एमाले वरिष्ठ नेता मनोनीत भएकी छन् । एमाले केन्द्रीय कमिटीको तेस्रो बैठकले पूर्वराष्ट्रपति भण्डारीलाई वरिष्ठ नेताको जिम्मेवारी प्रदान गरेको हो ।
यस्तै, बैठकले १० प्रतिशत सदस्य कोटामा २१ जनालाई केन्द्रीय सदस्यमा मनोनयन प्रस्ताव गरेको छ । सचिवालय बैठकमा अध्यक्ष केपी ओलीले प्रस्ताव गरेका नाम केन्द्रीय कमिटीमा प्रस्ताव भएको हो । यीबाहेक थप केही नेताहरुको नाम केन्द्रीय कमिटीबाट अनुमोदन हुनेछ ।
केन्द्रीय सदस्यमा मनोनीत हुनेमा देवराज घिमिरे, काशीनाथ अधिकारी, शिवमाया तुम्वाहाङ्फे, विमला घिमिरे, हरि घिमिरे, प्रेम दंगाललगायत छन् ।
केन्द्रीय कमिटी बैठकले ईश्वर पोखरेल, प्रदीप ज्ञवाली, देवराज घिमिरे, काशीनाथ अधिकारीलगायतलाई स्थायी समिति सदस्यमा मनोनयन गरेको छ ।
