काठमाडौं। तिब्बती क्षेत्रबाट भोटेकोसी हुँदै त्रिशूली नदीमा आएको हिमबाढीले रसुवा, नुवाकोट, धादिङ र गोरखाको पर्यटन क्षेत्रमा ५२ अर्ब १३ करोड रुपैयाँभन्दा बढीको क्षति पुर्याएको छ।
संस्कृति, पर्यटन तथा नागरिक उड्डयन मन्त्रालयद्वारा गठित अध्ययन समितिले तयार पारेको प्रारम्भिक प्रतिवेदनअनुसार विनाशकारी बाढीले होटल, रेस्टुरेन्ट, सवारीसाधन र पर्यटकीय पूर्वाधारमा ठूलो असर पारेको छ।
प्रतिवेदनका अनुसार होटल क्षेत्रमा मात्र १९ अर्ब ५६ करोड रुपैयाँको क्षति भएको छ। होटल व्यवसायी महासंघको तथ्यांकअनुसार बाढीले २०७ वटा होटल तथा रेस्टुरेन्ट क्षतिग्रस्त बनेका छन्।
यसबाहेक रेस्टुरेन्टतर्फ एक अर्ब ३८ करोड, सवारीसाधनमा एक अर्ब ५१ करोड, पदमार्गमा पाँच करोड, सम्पदा तथा पर्यटकीय पूर्वाधारमा एक अर्ब १२ करोड र राफ्टिङ तथा क्याम्पिङ साइटमा १५ करोड ५० लाख रुपैयाँको नोक्सानी भएको छ।
बाढीका कारण विदेशी पर्यटकबाट हुने आयमा १४ अर्ब ६० करोड, लाङटाङ क्षेत्रको व्यावसायिक कारोबारमा एक अर्ब २७ करोड र आन्तरिक पर्यटन आयतर्फ १९ करोड ८७ लाख रुपैयाँ गुमेको छ।
साथै, प्रभावित परिवारको भरणपोषण र जनशक्ति व्यवस्थापनमा १२ अर्ब २६ करोड रुपैयाँ थप खर्च लाग्ने अनुमान गरिएको छ। अध्ययन समितिका संयोजक सहदेव धमलाले पर्यटन क्षेत्र संकटमा परेका बेला सबै पक्ष एकजुट भएर काम गरिरहेको बताए।
उनले भने, ‘पर्यटन क्षेत्र संकटमा परेका बेला हामी सबै एकजुट भएर काम गरिरहेका छौं।’ होटल संघ नेपालका अध्यक्ष विनायक शाहले क्षतिको विवरण संकलन गर्नु निकै चुनौतीपूर्ण रहेको उल्लेख गरे।
ट्रेकिङ एजेन्सिज एसोसिएसन अफ नेपालका अध्यक्ष सागर पाण्डेले अब पर्यटन क्षेत्रको पुनरुत्थानका लागि योजनाबद्ध रूपमा अघि बढ्नुपर्ने बताए।
उनले भने, ‘रिकभरी गर्ने भनेको गतिविधि बढाएर अघि बढ्नु हो।’ बाढीबाट भएको जनधनको क्षति र पर्यटक बेपत्ता भएको घटनाले अन्तर्राष्ट्रिय स्तरमा नकारात्मक सन्देश गएको भन्दै व्यवसायीहरूले अब पर्यटकीय गतिविधि बढाउनुपर्नेमा जोड दिएका छन्।
