काठमाडौंः युक्रेनको वायु रक्षा प्रणालीमा देखिएको चरम अभावलाई उजागर गर्दै रुसी ड्रोनले किभस्थित युक्रेनी सुरक्षा सेवाको मुख्य मुख्यालयमा सीधा आक्रमण गरेको छ। चार वर्षभन्दा लामो समयदेखि जारी द्वन्द्वमा एसबीयू भवनमाथि दिउँसै प्रत्यक्ष आक्रमण भएको यो पहिलो घटना हो।
सीएनएनका अनुसार राजधानी किभमा रुसले लगातारजसो जारी राखेको हवाई आक्रमणको शृङ्खलाबद्ध हमलालगत्तै यो घटना भएको हो। आक्रमणमा परि १२ जना घाइते भएको र उद्धारकर्मीहरू घटनास्थलमा परिचालन गरिएको अधिकारीहरूले बताएका छन्।
युक्रेनी राष्ट्रपति भोलोडिमिर जेलेन्स्कीले उक्त ड्रोन सोही भवनमा रहेका एसबीयू प्रमुख ओलेक्जान्द्र पोक्लादको कार्यकक्षलाई लक्षित गरेर प्रहार गरिएको जानकारी दिए। यद्यपि, आक्रमणका बेला पोक्लाद सुरक्षित रहेको र उनलाई कुनै चोट नलागेको स्पष्ट पारेको छ।
गत महिनादेखि लगभग नरोकिई जारी रहेको आक्रमणका कारण किभ सहर र त्यस आसपासका क्षेत्रमा कम्तीमा ५३ जनाको मृत्यु भइसकेको छ भने १३४ जना घाइते भएका छन्। किभ सहरभित्रका विभिन्न भवनहरू तथा कोकाकोला उत्पादन गर्ने कारखानालगायत गोदामहरूमा पनि निरन्तर आक्रमण हुँदै आएका छन्। एसबीयू मुख्यालयमाथिको यो आक्रमणलाई एउटा ठूलो रणनीतिक वृद्धिको रूपमा हेरिएको छ।
युद्धको शुरूदेखि नै रुसले युक्रेनी सरकारी भवनहरूलाई लक्षित गर्दै किभमाथि ठूलो परिमाणमा हवाई आक्रमण गर्दै आएको छ। विगतमा केही भवनहरूमा क्षति पु¥याए पनि दिनको उज्यालोमा यत्तिको महत्त्वपूर्ण लक्ष्यमा आक्रमण गर्न सफल भएको यो पहिलो पटक हो।
