काठमाडौं । नेपाली कम्युनिष्ट पार्टीका संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ले रोपाइँ सकिँदासमेत किसानले सहज रूपमा रासायनिक मल पाउन नसकेको भन्दै सरकारको गम्भीर ध्यानाकर्षण गराएका छन् ।
मधेशसहित देशका विभिन्न भागमा रासायनिक मलको सहज आपूर्ति हुन नसक्दा किसानहरू समस्यामा परेको प्रचण्डले बताएका छन् । सरकारले समयमै पर्याप्त रासायनिक मल उपलब्ध गराउने प्रतिबद्धता जनाए पनि व्यवहारमा आपूर्ति सहज हुन नसकेको उनको भनाइ छ ।
उपलब्ध मलसमेत कालोबजारी र बिचौलियाका कारण किसानसम्म समन्यायिक रूपमा पुग्न नसकेको गुनासो व्यापक रूपमा आइरहेको उनले उल्लेख गरेका छन् ।
‘यतिखेर रोपाइँ सकिँदासमेत मधेशलगायत देशका विभिन्न भागमा रासायनिक मलको सहज आपूर्ति हुन नसक्दा किसानहरू ठूलो समस्यामा परेका छन् । सरकारले समयमै रासायनिक मलको पर्याप्त आपूर्ति गर्ने प्रतिबद्धता जनाए पनि व्यवहारमा आपूर्ति सहज हुन सकेको छैन,’ प्रचण्डले भनेका छन् ।
नेपालमा रासायनिक मल आयातको प्रक्रिया जटिल रहेकाले त्यसका लागि समयमै पूर्वतयारी आवश्यक हुने उनले बताएका छन् । आफ्नो नेतृत्वको तत्कालीन सरकारले मल आयात तथा वितरणको गम्भीरतालाई ध्यानमा राख्दै समयमै आपूर्ति र वितरणको व्यवस्था गर्नुका साथै आगामी आर्थिक वर्षका लागि आवश्यक बजेटसमेत सुनिश्चित गरेको उनले दाबी गरेका छन् ।
मल उपलब्ध भए पनि कालोबजारी र बिचौलियाका कारण किसानले सहज रूपमा प्राप्त गर्न नसकेको विषयमा सरकार गम्भीर हुनुपर्नेमा उनले जोड दिएका छन् ।
प्रचण्डले रासायनिक मल आयातको प्रक्रिया यथाशीघ्र सम्पन्न गरी पर्याप्त मलको आपूर्ति सुनिश्चित गर्न सरकारसँग आग्रह गरेका छन् । आगामी वर्षका लागि समेत आवश्यक तयारी गर्न तथा मल वितरणमा देखिएका समस्या समाधान गर्न उनले सरकारको ध्यानाकर्षण गराएका छन् ।
त्यस्तै, कालोबजारी र बिचौलियामाथि प्रभावकारी नियन्त्रण गर्दै किसानलाई सहज, पारदर्शी र समन्यायिक रूपमा मल वितरणको व्यवस्था मिलाउन उनले आग्रह गरेका छन् ।
‘यस विषयमा सरकारको गम्भीर ध्यानाकर्षण गराउँदै रासायनिक मलको आयात प्रक्रिया यथाशीघ्र सम्पन्न गरी पर्याप्त मलको आपूर्ति सुनिश्चित गर्न, आगामी वर्षका लागि समेत तयारी गर्न तथा कालोबजारी एवं बिचौलियामाथि प्रभावकारी नियन्त्रण गर्दै किसानलाई सहज, पारदर्शी र समन्यायिक रूपमा मल वितरण गर्न आग्रह गर्दछु,’ प्रचण्डले भनेका छन् ।
