काठमाडौं । सत्याग्रहमा रहेका डा. गोविन्द केसीसँग वार्ता गरी अनशनको निकास खोज्न सरकारका थप प्रतिनिधि धनगढी पुगेका छन् । प्रधानमन्त्री बालेन शाहका स्वास्थ्य सल्लाहकार जेपी अग्रवाल र स्वास्थ्य तथा खाद्य स्वच्छता मन्त्रालयका सचिव डा। विकास देवकोटा आइतबार बुद्ध एयरको उडानमार्फत धनगढी पुगेका हुन् ।
यसअघि नै शिक्षा तथा खेलकुद मन्त्रालयका सचिव चूडामणि पौडेल धनगढी पुगिसकेका छन् । शिक्षामन्त्री सस्मिता पोखरेलको निर्देशनमा उनी शनिबार नै धनगढी पुगेका थिए ।
शिक्षामन्त्री पोखरेलले शुक्रबार साँझ डा. केसीसँग टेलिफोनमार्फत कुराकानी गरेपछि वार्ताको वातावरण बनाउन सचिव पौडेललाई धनगढी पठाइएको थियो ।
सरकारी टोलीले आजै डा। केसीका प्रतिनिधिसँग छलफल गर्ने तयारी गरेको छ । वार्तामार्फत सहमतिमा पुगेर डा। केसीको सत्याग्रह अन्त्य गर्ने सरकारको प्रयास रहेको बताइएको छ । स्वास्थ्यमा समस्या देखिएपछि डा. केसीलाई चिकित्सकको सल्लाहमा शनिबार सेती प्रादेशिक अस्पतालमा भर्ना गरिएको छ ।
