सन् २०२५ मा नेपालबाट ५ सय १ जना विदेशी नागरिकलाई देश निकाला गरिएको छ ।
अध्यागमन विभागका अनुसार देश निकाला गरिएकामध्ये ४ सय ३७ जना पर्यटक भिसामा १ सय ५० दिनभन्दा बढी समय ओभरस्टे गरेर बसेका थिए ।
यसैगरी, बाँकी ६४ जना विभिन्न किसिमका आपराधिक गतिविधिमा संलग्न रहेको आरोपमा नेपालबाट निष्कासन गरिएको हो ।
भिसाको उद्देश्यविपरीत नेपालमा बसोबास गर्ने, लागूऔषध कारोबार, मानव बेचबिखन, संगठित अपराध, विदेशी मुद्रा अपचलन तथा अभद्र व्यवहारजस्ता कसुरमा संलग्न भई सजायँ भुक्तान गरिसकेकाहरुलाई अध्यागमन विभागले डिपोर्ट गरेको जनाएको छ ।
अध्यागमन विभागले भिसा नियम उल्लङ्घन तथा आपराधिक गतिविधिमा संलग्न विदेशी नागरिकमाथि कडाइका साथ निगरानी र कारबाही जारी राख्ने बताएको छ ।
यसैगरी सन् २०२५ मा अध्यागमनले ३६ विभिन्न मुलुकका १ सय १६ जना विदेशी नागरिकलाई नेपाल प्रवेशमा रोक लगाएको छ ।
अध्यागमन विभागका अनुसार ती विदेशीलाई त्रिभुवन अन्तर्राष्ट्रिय विमानस्थलसहितका नाकाबाट नेपाल प्रवेश गर्न नदिई सम्बन्धित मुलुकमै फिर्ता पठाइएको हो ।
प्रवेश अस्वीकार गरिएका विदेशीमध्ये चीनका नागरिकको संख्या सबैभन्दा बढी रहेको विभागले जनाएको छ । त्यसपछि भारतसहित अन्य एसियाली, युरोपेली र अफ्रिकी मुलुकका नागरिक पनि इन्ट्री रिफ्युजमा परेका छन् ।
अध्यागमन विभागका अनुसार भिसाको म्याद सकिएको, भिसाको उद्देश्यविपरीत नेपाल प्रवेश गर्न खोजेको, विगतमा शंकास्पद गतिविधिमा संलग्न रहेको, आपराधिक अभिलेख भेटिएको वा सुरक्षा जोखिम देखिएको अवस्थालाई आधार मानेर विदेशी नागरिकलाई प्रवेशमा रोक लगाइएको हो । यसका साथै पटक–पटक अध्यागमन नियम उल्लंघन गर्ने व्यक्तिलाई पनि नेपाल प्रवेश निषेध गरिएको बताइएको छ ।
गृह मन्त्रालय मातहतको अध्यागमन विभागले पछिल्लो समय राष्ट्रिय सुरक्षा, मानव बेचबिखन नियन्त्रण, संगठित अपराध र अवैध गतिविधि रोकथामलाई प्राथमिकतामा राख्दै भिसा तथा प्रवेश प्रक्रियामा कडाइ गरेको जनाएको छ ।
विभागका अनुसार विदेशी नागरिकको नेपाल आगमन बढेसँगै जोखिम मूल्यांकन, डकुमेन्ट जाँच र प्रोफाइलिङ प्रणालीलाई थप प्रभावकारी बनाइएको छ । आवश्यक मापदण्ड पूरा नगर्ने वा नेपालका लागि जोखिम देखिएका विदेशीलाई प्रवेश अनुमति नदिइने नीति निरन्तर रहने विभागले स्पष्ट पारेको छ ।
