काठमाडौँ । नेपाली कांग्रेसको विधानले नियमित वा विशेष महाधिवेशन गर्ने अधिकार केन्द्रीय कार्य समितिलाई मात्र दिएको स्पष्ट भएको कांग्रेस नेता कल्याण गुरुङले बताउनुभएको छ। केन्द्रीय कार्य समिति बाहेक कुनै पनि समिति, पदाधिकारी वा व्यक्तिलाई महाधिवेशन आह्वान गर्ने अधिकार विधानले नदिएको उहाँको भनाइ छ।
उहाँका अनुसार केन्द्रीय कार्य सम्पादन समितिले गरेको महाधिवेशनसम्बन्धी कुनै पनि निर्णय केन्द्रीय कार्य समितिबाट अनुमोदन नभएसम्म वैधानिक मानिँदैन। २०८२ मंसिर १५ गते नै केन्द्रीय कार्य समितिले २०८२ पुस २६, २७ र २८ गते पार्टीको १५औँ महाधिवेशन गर्ने निर्णय गरिसकेपछि विशेष महाधिवेशनको औचित्य समाप्त भइसकेको गुरुङको भनाइ छ।
केन्द्रीय कार्य सम्पादन समितिले पुसमा महाधिवेशन गर्न नसकिने ठहर गर्दै मिति परिवर्तन गरी २०८३ वैशाख २८, २९, ३० र ३१ गते तोकेको र मुलुक निर्वाचन प्रक्रियामा गइसकेको अवस्थामा विशेष महाधिवेशनको चर्चा निरर्थक रहेको उहाँले बताउनुभयो।
गुरुङले पार्टीको विधान, विधि र प्रक्रिया अनुसार वैधानिक समितिबाट गरिएका निर्णय मात्र मान्य हुने उल्लेख गर्दै सामाजिक सञ्जालमा चलाइएको विशेष महाधिवेशनको हल्लालाई विधानले मान्यता नदिने स्पष्ट पार्नुभयो। उहाँले केही व्यक्तिहरूले बोलाउने भेला सानो गुटको भेला मात्र हुने दाबी गर्नुभयो।
पार्टी विधानअनुसार कुनै पनि प्रक्रिया पूरा नभएकाले विशेष महाधिवेशन नहुने र हुन नसक्ने गुरुङको निष्कर्ष छ।
