काठमाडौँ । जेन–जी आन्दोलनको जाँचबुझ गर्न गठित आयोगले तत्कालीन गृहमन्त्री रमेश लेखकको बयान सकिएलगत्तै तत्कालीन प्रधानमन्त्री तथा एमाले अध्यक्ष केपी शर्मा ओलीलाई पत्र लेख्ने भएको छ।
आयोगले मंगलबार लेखकलाई पत्र पठाइसकेको आयोगका प्रवक्ता विज्ञानराज शर्माले जानकारी दिए। लेखकको बयानपछि तत्कालीन प्रधानमन्त्री ओलीलाई औपचारिक रूपमा पत्र लेखिने शर्माले बताए।
‘हामी पालैपालो उहाँहरूसँग कुरा गर्ने तयारीमा छौँ। पहिले तत्कालीन मन्त्रीज्यूसँग कुरा हुन्छ, त्यसपछि तत्कालीन प्रधानमन्त्रीज्यूलाई पत्र लेख्छौँ,’ शर्माले भने। जाँचबुझको काम सकेर सरकारलाई प्रतिवेदन बुझाउनुपर्ने भएकाले आयोगले छिटो काम सक्ने तयारी गरेको उनले बताए।
‘सत्यतथ्य जे हो, त्यही जानकारी सरकारलाई दिने हाम्रो उद्देश्य हो। त्यसका लागि तत्कालीन समयका जिम्मेवार पदाधिकारीहरूले सहयोग गर्दै आउनुभएको छ,’ उनले भने, ‘आगामी दिनमा पनि अन्य पदाधिकारीज्यूहरूबाट यस्तै सहयोग हुने विश्वास छ।’
यद्यपि, पत्र पठाइएको समाचार सार्वजनिक भएपछि तत्कालीन गृहमन्त्री लेखक बयानमा जाने वा नजाने भन्ने विषयमा परामर्श गरिरहेका छन्। तत्कालीन प्रधानमन्त्री ओलीले भने आयोगको हैसियतप्रति नै प्रश्न उठाउँदै बयान दिन नजाने अडान लिँदै आएका छन्।
