काठमाडौं । नेकपा एमालेको ११औँ राष्ट्रिय महाधिवेशनस्थल भृकुटीमण्डप उम्मेदवारका प्रचार सामग्रीले अस्तव्यस्त बनेको छ।
नेतृत्व चयनका लागि महाधिवेशन जारी रहँदा प्रचार सामग्री जथाभावी फालिँदा भृकुटीमण्डप क्षेत्र फोहोर भएको हो। क्षेत्रका सडक, फुटपाथ तथा खुला स्थानमा उम्मेदवारका पर्चा, पम्पलेट र ब्यानर छरपस्ट देखिन्छन्। भोट माग्ने नाममा छरिएका ती सामग्रीले सार्वजनिक स्थल कुरूप बनाउनुका साथै सिंगो क्षेत्रको सौन्दर्यसमेत बिगारेको छ।
ठूला भाषण र अनुशासनका कुरा गर्ने एमालेले वातावरणीय जिम्मेवारी र सार्वजनिक सरसफाइमा भने बेवास्ता गरेको देखिएको छ। महाधिवेशनस्थलमा जम्मा भएको फोहोर बुधबार बिहान काठमाडौं महानगरपालिकाले ब्रुमर प्रयोग गरी सफा गरेको हो।
महाधिवेशनमा अध्यक्ष पदका लागि केपी शर्मा ओली र ईश्वर पोखरेल चुनावी मैदानमा उत्रिएका छन्।
