काठमाडौं । इथियोपियामा १२ हजार वर्षपछि पहिलो पटक आइतबार ज्वालामुखी विस्फोट भएको छ। विस्फोटपछि निस्किएको खरानी र सल्फर डाइअक्साइड करिब १५ किलोमिटर उचाइसम्म पुगेको र त्यसपछि लाल सागर हुँदै यमन र ओमानसम्म फैलिएको अन्तर्राष्ट्रिय समाचार एजेन्सीहरूले जनाएका छन्।
सोमबार राति करिब ११ बजे इथियोपियाबाट ४ हजार ३०० किलोमिटर टाडा रहेको दिल्लीको आकाशमा समेत उक्त खरानीको बादल पुगेको पुष्टि गरिएको छ। इन्डिया मेट स्काई वेदर अलर्टका अनुसार खरानीको बादल भारतमा जोधपुर–जैसलमेर क्षेत्र हुँदै प्रवेश गरी उत्तरपूर्व दिशातर्फ सरिरहेको छ।
यो बादल राजस्थान, हरियाणा र दिल्लीमा फैलिसकेको छ। यसको केही भाग गुजरातसम्म पुग्ने सम्भावना छ। साथै राति पञ्जाब, पश्चिम उत्तर प्रदेशका पहाडी क्षेत्र तथा हिमाचल प्रदेशमा पनि यसको प्रभाव देखिन सक्ने अनुमान गरिएको छ।
प्रभावका कारण एयर इन्डियाले ११ उडान रद्द गरेको छ। ‘हायली गुब्बी’ (घना खरानीयुक्त) ज्वालामुखी विस्फोटपछि प्रभावित क्षेत्रमा उडेका विमानको थप जाँच भइरहेको हुँदा उडान रद्द गरिएको एयरलाइन्सले एक्समा जानकारी गराएको छ।
एयरलाइन्सले भनेको छ, “हाम्रो नेटवर्कभरिका ग्राउन्ड टोलीहरूले यात्रुहरूलाई उडान स्थिति बारे अद्यावधिक गरिरहेका छन्। होटल आवाससहित आवश्यक सहयोग उपलब्ध गराइरहेका छौँ र सकेसम्म चाँडो पुनः यात्रा व्यवस्था मिलाउने प्रयास भइरहेको छ।”
एयर इन्डियाले यात्रुहरूलाई परेकाे असुविधाकाे लागि माफीमाेग्दै यात्रुको सुरक्षा आफ्नो पहिलाे प्राथमिकता रहेकाे स्पष्ट गरेको छ।
ज्वालामुखी विस्फोटबाट अहिलेसम्म कुनै मानवीय क्षति नदेखिएको बताइए पनि यमन र ओमानका सरकारले विशेषगरी श्वासप्रश्वास समस्या भएका नागरिकलाई सतर्कता अपनाउन आग्रह गरेका छन्।
