काठमाडौँ- नेकपा (एमाले) बाट अलगिएर चार वर्षअघि गठन भएको माधवकुमार नेपाल नेतृत्वको नेकपा (एकीकृत समाजवादी) पार्टी औपचारिक रूपमा तीन टुक्रामा विभाजित भएको छ।
अध्यक्ष नेपालसहितका बहुमत नेताहरू माओवादी केन्द्रलगायत १० वाम घटकसँग पार्टी एकता प्रक्रियामा सहभागी भएपछि एकीकृत समाजवादी विभाजित बनेको हो।
अध्यक्ष माधवकुमार नेपाल, सम्मानित नेता झलनाथ खनाल, वरिष्ठ नेता बेदुराम भुसाल, प्रमेश हमाल, राजेन्द्र पाण्डे, प्रकाश ज्वाला र जगन्नाथ खतिवडालगायतका नेता नवगठित ‘नेपाली कम्युनिस्ट पार्टी’ मा सामेल भएका छन्।
यससँगै महासचिव घनश्याम भुसालले भने नेकपा (एकीकृत समाजवादी) लाई नै पुनर्गठन गरी ‘क्रान्तिकारी पार्टी’ निर्माण गर्ने घोषणा गरेका छन्। भुसाल पक्षमा वरिष्ठ नेता घनेन्द्र बस्नेत, विजय पौडेल, जीवनराम श्रेष्ठ र दामोदर अर्याललगायतका नेताहरू छन्। उनीहरूले बुधबार आयोजित पत्रकार सम्मेलनमार्फत मङ्सिरमा राष्ट्रिय सम्मेलन बोलाई नयाँ पार्टी संरचना घोषणा गर्ने तयारी गरेको जनाएका छन्।
तेस्रो धारका रूपमा नेतृ रामकुमारी झाँक्री समूह छुट्टिएको छ। झाँक्रीले बुधबारै पत्रकार सम्मेलन गर्दै एकीकृत समाजवादीसँगको यात्रा टुङ्गिएको घोषणा गरिन्। उनको समूहले तत्काल नयाँ संगठनमा नजाने भए पनि एमालेमा पुनः फर्कने सम्भावना उच्च देखिएको छ।
२०७८ सालमा एमाले विभाजनको निर्णायक चरणमा माधव नेपाललाई बलियो साथ दिएकी झाँक्रीको यो निर्णयसँगै ‘एकीकृत समाजवादी’ नाम मात्रको पार्टी बनेको राजनीतिक विश्लेषकहरूको टिप्पणी छ।
