काठमाडौं । नेपाल राष्ट्र बैंकले आज (बुधवार) ५० अर्ब रुपैयाँ निक्षेप संकलन गर्ने भएको छ । वित्तीय प्रणालीमा अधिक तरलता कायम रहेपछि केन्द्रीय बैंकले निक्षेप संकलन उपकरण मार्फत बोलकबोल प्रणालीद्वारा रकम तान्न लागेको हो ।
गत हप्तादेखि दीर्घकालीन अवधिको (१७५ दिन) निक्षेप संकलन गर्दै आएको राष्ट्र बैंकले आज पनि त्यही अवधिको निक्षेप संकलन गर्न लागेको हो । बैंकले अनलाइन खरिद प्रणालीमार्फत बोलकबोल सञ्चालन गर्ने तयारी गरेको छ ।
राष्ट्र बैंकका अनुसार आजको बोलकबोल अन्तर्गत संकलित निक्षेपको सावाँ तथा ब्याज २०८३ साल वैशाख १६ गते भुक्तानी हुनेछ । बोल गर्न सकिने रकम न्यूनतम १० करोड रुपैयाँ र अधिकतम ५ करोडका गुणकमा रहनेछ । ब्याजदर भने प्रतिस्पर्धात्मक बोलकबोल प्रक्रियामार्फत निर्धारण हुनेछ ।
खुला बजार कारोबार कार्यविधिअनुसार दीर्घकालीन तरलता देखिएमा त्यसको व्यवस्थापन गरी बजार ब्याजदर सन्तुलित राख्न ६ महिनासम्म अवधिको निक्षेप संकलन उपकरण प्रयोग गर्न सकिने व्यवस्था छ । यही प्रावधानअनुसार राष्ट्र बैंकले पछिल्ला महिनाहरूमा पटक–पटक दीर्घकालीन निक्षेप संकलन गर्दै आएको हो ।
राष्ट्र बैंकले वित्तीय प्रणालीको बढी तरलता घटाउन र ब्याजदर स्थिर राख्नका लागि स्थायी निक्षेप सुविधा (Standing Deposit Facility) तथा अन्य निक्षेप संकलन उपकरण प्रयोग गर्दै आएको छ ।
आजको बोलकबोलमा ‘क’, ‘ख’ र ‘ग’ वर्गका बैंक तथा वित्तीय संस्थामात्र सहभागी हुन पाउनेछन् । बाँडफाँट गर्दा सबैभन्दा कम ब्याजदर बोल गर्ने प्रस्तावहरू प्राथमिकतामा राखी आह्वान गरिएको कुल रकमसम्म क्रमशः बाँडफाँट गरिने राष्ट्र बैंकले जनाएको छ ।
हाल देशभरका बैंक तथा वित्तीय संस्थाहरूमा कुल निक्षेप ७४ खर्ब ७५ अर्ब रुपैयाँ पुगेको छ । निक्षेप वृद्धि दर उच्च रहँदा पनि कर्जा प्रवाहमा वृद्धि नदेखिएपछि केन्द्रीय बैंकले दीर्घकालीन निक्षेप संकलनमार्फत बजारको अतिरिक्त तरलता नियन्त्रण गर्ने रणनीति अपनाएको हो ।
