नेपाली कांग्रेसको महाधिवेशनको विषयमा छलफल गर्न संस्थापन पक्षीय केन्द्रीय सदस्यहरूले भेला गरेका छन् ।
नयाँ वानेश्वरस्थित आनन्दभूमि ब्याङ्क्वेटमा संस्थापन पक्षीय केन्द्रीय सदस्यहरू छलफलमा जुटेका छन् । भेलामा पार्टीको कार्यसम्पादन समितिमा नरहेका संस्थापन पक्षीय केन्द्रीय सदस्यहरू पनि छन् । नेताहरू वीरबहादुर बलायर, सीता गुरुङ, भण्डारी, मीन विश्वकर्मा, केन्द्रीय सदस्यहरू दवेन्द्रराज कँडेल, किरण पौडेल, नागिना यादव, महिन्द्रा लिम्बु, गुरु बराल, नैनसिंह महर सहितका नेताहरू भेलमा उपस्थित भएका छन् ।
केन्द्रीय सदस्य महरका अनुसार जारी केन्द्रीय समितिलाई कसरी प्रभावकारी बनाउने र महाधिवेशनको मितिमा कुरा नमिले पार्टीलाई कसरी निकास दिने भनेर छलफल हुनेछ । महाधिवेशनको विषमा केन्द्रीय समिति अनिर्णयको बन्दी बनिरहेका बेलामा कसरी संकटको निकास निकाल्ने भनेर छलफल केन्द्रित रहने उनले बताए ।
आगामी फागुन २१ गतेका लागि सरकारले घोषणा गरेको निर्वाचनलाई सफल बनाउन पार्टीले तत्काल संस्थागत निर्णय गर्नका लागि दबाब दिने तयारी पनि भेलाको छ ।
शेखरलाई दबाब
यता, विशेष महाधिवेशनका लागि हस्ताक्षर संकलन गरेको समूहले नेता डा. शेखर कोइरालासँग विशेष महाधिवेशनको नेतृत्व लिएर वातावरण बनाउन आग्रह गरेको छ।
कोइरालाले मंसिरभित्रै नियमित महाधिवेशन गर्नुपर्ने र सम्भव नभए केन्द्रीय कार्यसमितिले आफैँ विशेष महाधिवेशन बोलाउनुपर्ने पक्षमा छन् ।
सोमबार बिहान विशाल नगरस्थित कोइरालाको सम्पर्क कार्यालयमा गएको हस्ताक्षर संकलन गरेको समूहले उनीसँग विशेष महाधिवेशनको नेतृत्व लिएर वातावरण बनाउन आग्रह गरेको हो ।
नेता कोइरालाले मंसिरभित्रै नियमित महाधिवेशनको विषय र विशेष महाधिवशेनमा जाने विषयमा आफूले समन्वय गरिराखेको बताएका छन् ।
भेटमा नेता कोइरालाले मंसिरभित्रै नियमित महाधिवेशन गर्नुपर्ने र सम्भव नभए केन्द्रीय कार्यसमितिले आफैँ विशेष महाधिवेशन बोलाउनुपर्ने धारणा व्यक्त गरे ।
