सोमबार त्रिभुवन अन्तर्राष्ट्रिय विमानस्थलमा सभामुख अग्नि सापकोटाको साथमा चिनियाँ सभामुख ली चाङ्सु । फाइल तस्बिर
काठमाडौं– तीन दिने भ्रमणमा रहेका चिनियाँ सभामुख ली चाङ्सुले मंगलबार प्रधानमन्त्री शेरबहादुर देउवासहित शीर्ष नेतासँग भेट गर्दैछन्।
सोमबार नेपाल भ्रमणका आएका लीले प्रधानमन्त्री शेरबहादुर देउवा, नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’, प्रतिपक्षी दलका नेता एमाले अध्यक्ष केपी ओली, राष्ट्रिय सभाका अध्यक्ष गणेश निमल्सिना, परराष्ट्रमन्त्री डा. नारायण खड्कासहित शीर्ष नेतासँग भेटवार्ता गर्नेछन्।
नेता लीसँग राष्ट्रिय सभाका अध्यक्ष तिमल्सिनाले मंगलबार बिहान सवा ९ बजे संघीय संसद भवनमा भेटवार्ता गर्ने कार्यक्रम रहेको छ। लीले संसद भवनमै बिहान १० बजे प्रमुख प्रतिपक्षी दलका नेता एमाले अध्यक्ष ओलीसँग भेट गर्नेछन्।
पौने ११ बजे नेकपा (माओवादी केन्द्र)का अध्यक्ष प्रचण्डसँग भेट गर्ने कार्यसूची सार्वजनिक भएको छ। लीले केही समय संसद भवनमा अन्य सांसदसँग संवाद गर्ने कार्यक्रम छ।
मंगलबार दिउँसो ३ बजे सभामुख लीले परराष्ट्रमन्त्री डा. नारायण खड्कासँग भेट गर्नेछन्। प्रधानमन्त्रीसँगको भेट अपरान्ह ४ बजे हुनेछ। बालुवाटारमा आधा घण्टा प्रधानमन्त्री देउवासँग वार्ता हुनेछ।
लीले यसअघि सोमबार सभामुख अग्निप्रसाद सापकोटासँग भेटवार्ता गरिसकेका छन्। लीको स्वागतका लागि सभामुख सापकोटा सोमबार त्रिभुवन अन्तर्राष्ट्रिय विमानस्थलमा पुगेका थिए।
