काठमाडौं । राष्ट्रपति डोनल्ड ट्रम्पलाई टक्कर दिँदै अमेरिकाका अर्बपति व्यवसायी एलन मस्कले नयाँ राजनीतिक दल गठनको घोषणा गरेका छन् । उनले ‘अमेरिका पार्टी’ नाम दिएको दल घोषणा गरेका हुन् । मस्कले आफ्नो सामाजिक सञ्जाल एक्समार्फत् यसबारे जानकारी दिएका हुन् ।
मक्सले सामाजिक सञ्जालमा लेखेका छन्, ‘आज अमेरिका पार्टी गठन हुँदैछ ताकि तपाईंले आफ्नो स्वतन्त्रता फिर्ता पाउन सक्नुहोस्’, उनले भनेका छन्– ‘तपाईंहरूमध्ये ६६ प्रतिशतले नयाँ राजनीतिक दल चाहनुहुन्छ, अब तपाईंले त्यो पाउनुहुनेछ । अमेरिकालाई बर्बाद गर्ने र भ्रष्टाचार गर्ने सन्दर्भमा अमेरिकाका दुवै (रिपब्लिकन र डेमोक्र्याटिक) दल समान छन् ।’
मक्सले यस सम्बन्धमा एक्समा सार्वजनिक सर्वेक्षण पनि गरेका थिए ।
मस्कले चार जुलाईमा अमेरिकाको स्वतन्त्रता दिवसका अवसरमा एक्समा एउटा मत सर्वेक्षण राखेका थिए । त्यसमा उनले सोधेका थिए, ‘के तपाईं दुई–दलीय प्रणालीबाट स्वतन्त्रता चाहनुहुन्छ ? के हामीले अमेरिकामा नयाँ पार्टी बनाउनुपर्छ ?’ सर्वेक्षणको नतिजामा, ६५.४ प्रतिशतले ‘हो’ र ३४.६ प्रतिशतले ‘होइन’ मत दिएका थिए ।
मस्क र राष्ट्रपति डोनाल्ड ट्रम्पबीच ‘बिग ब्युटिफूल बिल’ लाई लिएर चर्को बहस भएको थियो । त्यसपछि मस्कले आफूलाई ट्रम्प प्रशासनबाट बिदा भएका थिए । जवाफमा ट्रम्पले भने, ‘जब हामीले विद्युतीय सवारी साधनको अनिवार्य खरिदको अनुदान काट्ने बारेमा कुरा गर्यौं तब मस्कलाई समस्या हुन थाल्यो । म एलनसँग धेरै निराश छु । मैले उनलाई धेरै मद्दत गरेको छु ।’
त्यसपछि मस्कले आफ्नो सामाजिक सञ्जाल एक्समा ट्रम्पलाई कृतघ्न भन्दै धेरै सन्देश लेखेका थिए । मस्कले भने, ‘यदि म नभएको भए, ट्रम्पले चुनाव हार्थे ।’ उनले ट्रम्पलाई महाभियोग लगाउनेसम्मका कुरासमेत गरेका थिए । वास्तवमा मस्क ट्रम्पको यो विधेयकले अमेरिकामा लाखौं रोजगारी समाप्त गर्नुका साथै अमेरिकालाई ठूलो रणनीतिक क्षति पुग्ने विश्वास गर्छन। दुवै सदनबाट पारित भएर ट्रम्पले हस्ताक्षर गरेपछि ‘बिग ब्युटिफूल बिल’ कानुन बनेको छ ।
