काठमाडौं। संघीय संसदको राज्य व्यवस्था तथा सुशासन समितिमा पारित निजामती सेवा विधेयकको ‘कुलिङ पिरियड’ सम्बन्धी दफामा भएको हेरफेरप्रति नेपाली कांग्रेसका सांसद हृदयराम थानीले गम्भीर आपत्ति जनाएका छन्।
बुधबार बसेको समितिको आकस्मिक बैठकमा सांसद थानीले समितिका सभापति रामहरि खतिवडा र सचिव सुरजकुमार दुरा दुवैलाई उत्तरदायी ठहर गर्दै प्रश्न उठाए कि, “यस्तो महत्त्वपूर्ण विषयमा तपाईंहरूलाई थाहा छैन भन्न मिल्छ?”
“दुरा जी, तपाईं सचिव भएर दफा हटाएको वा राखेको थाहा छैन भन्न मिल्दैन। समितिको टाठोबाठो सभापति हो? थाहा पाइन भन्न मिल्दैन,” — सांसद थानी।
थानीले सभापतिले छलफल र सहमतिविनै व्यक्तिगत रूपमा निर्णय लिएको आरोप लगाउँदै भने, “सभापतिले मनपरी गर्नुभयो, हामीलाई चित्त दुखाउने काम गर्नुभयो। अब त संसदीय समिति नै गठन हुनुपर्छ।”
त्यसक्रममा उनले कोर टिममा कस-कसको संलग्नता थियो भन्ने विषयमा पनि जवाफ माग गरे। “इमानदार साथ भन्नुस्, कोर टिममा कांग्रेस र एमालेबाट को-को सदस्य राख्नुभएको थियो?” भन्दै उनले थप स्पष्ट पार्न दबाब दिए।
यसअघि एमाले नेता पदम गिरीले पनि यो घटनालाई “नेपालको संसदीय इतिहासकै लज्जास्पद अवस्था” भन्दै सभापति र सचिवको राजीनामा माग गरिसकेका छन्।
