काठमाडौं । भारतमा फेरि कोरोना संक्रमण फैलिन थालेको छ। पछिल्लो विवरणअनुसार देशका १६ राज्यमा सक्रिय संक्रमित भेटिएका छन्। भारतको स्वास्थ्य तथा परिवार कल्याण मन्त्रालयले सोमबार सार्वजनिक गरेको तथ्याङ्कअनुसार हालसम्म कुल १ हजार ९ जनामा कोरोना संक्रमण पुष्टि भइसकेको छ।
संक्रमणको सबैभन्दा बढी असर केरलमा देखिएको छ, जहाँ ४०३ जना सक्रिय संक्रमित रहेका छन्। यसैगरी महाराष्ट्रमा ४३०, दिल्लीमा १०४, गुजरातमा ८३, तमिलनाडुमा ६९ र कर्नाटकमा ४७ जनामा संक्रमण पुष्टि भएको मन्त्रालयले जनाएको छ।
अन्य राज्यहरूमा पनि संक्रमण देखिन थालेको छ। उत्तर प्रदेशमा १५, राजस्थानमा १३, पश्चिम बङ्गालमा १२, हरियाणा र पुडुचेरीमा ९–९, आन्ध्र प्रदेशमा ४, मध्य प्रदेशमा २, र तेलङ्गाना, गोवा तथा छत्तीसगढमा १–१ जना संक्रमित फेला परेका छन्।
यसबीचमा कर्नाटकका स्वास्थ्य मन्त्री दिनेश गुन्डु रावले संक्रमण बढ्दै गएको खबरबीच पनि अहिलेको कोरोना अवस्था गम्भीर नभएको बताएका छन्। उनले दक्षिण–पूर्वी एसियाका केही मुलुकमा संक्रमण विस्तार भइरहेको सुनेको जनाउँदै भारतमा देखा परेको संक्रमणको स्वरूप हल्का रहेको दाबी गरे।
“केही राज्यमा मृत्युका घटनाहरू देखिए पनि ती मृत्युलाई सिधै कोभिडसँग सम्बन्धित ठान्न मिल्दैन,” मन्त्री रावले भने, “ती बिरामीहरूमा अन्य स्वास्थ्य समस्या पनि थिए।”
तर उनले जोखिम नलिन सतर्कता अपनाउन जरुरी रहेको बताए। भारत सरकारले स्वास्थ्य संस्थाहरूलाई निगरानी कडा पार्न, परीक्षण बढाउन र आवश्यक सावधानी अपनाउन निर्देशन दिइसकेको छ।
विशेषगरी चाडपर्व र गर्मीयाममा संक्रमण तीव्र हुन सक्ने भन्दै सर्वसाधारणलाई स्वास्थ्य मापदण्ड पालना गर्न मन्त्रालयले आग्रह गरेको छ।
