काठमाडौँ : अत्यधिक गर्मीका कारण एशियाको जापानदेखि यूरोपको इटालीसम्मको जनजीवन प्रभावित बनेको छ। जापानका अत्यधिक गर्मीको लहरले केही क्षेत्रमा तापक्रम ४० डिग्री सेल्सियससम्म पुग्नसक्ने चेतावनी दिइएको छ।
जापान मौसम विज्ञान एजेन्सी (जेएमए) ले उच्च चापीय प्रणालीले मुख्यतया पूर्वी र पश्चिमी जापानमा घाम लाग्ने र चिसो मौसम ल्याउन जारी राखेकाले कुमागाया, कोफु र हमामात्सु शहरमा तापक्रम ४० डिग्री सेल्सियस पुग्ने सम्भावना रहेको बताएको छ।
जेएमएका अनुसार साइतामा, माइबाशी, क्योटो र ओकायामामा दिनको उच्च तापक्रम ३९ डिग्री र मध्य टोकियो, उत्सुनोमिया‚ ओत्सु र कोची शहरमा ३८ डिग्री सेल्सियस रहने अनुमान गरिएको छ।
मौसम अधिकारीहरूले मानिसहरूलाई एयर कन्डिसनर प्रयोग गर्न नहिचकिचाउन र बारम्बार तरल पदार्थ र नुन लिन र अनावश्यक बाहिर निस्कन र व्यायाम नगर्न आग्रह गरेका छन्।
यसैगरी इटालीको स्वास्थ्य मन्त्रालयले देशका २७ ठूला शहरमध्ये १३ वटामा रेड अलर्ट जारी गरेको छ। तातो र सुक्खा मौसमले स्वस्थ व्यक्तिलाई समेत स्वास्थ्य जोखिममा पार्ने संकेत गरेको छ।
चेतावनी दिइएका शहरमा बोलोग्ना, फ्लोरेन्स, मिलान, नेपल्स, पालेर्मो र रोम समावेश छन्। तीव्र गर्मीको लहरका बीचमा पानीको सतह घटेको छ र देशका दक्षिणी क्षेत्रमा पानीको अभाव भएको छ। इटालीले तीव्र र लामो गर्मीको लहरको प्रभावसँग संघर्ष गरेको यो लगातार तेस्रो वर्ष हो।
