गाजा पट्टी (प्यालेस्टिनी अधीनस्थ क्षेत्र)। इजराइली संसद्ले बिहीबार प्यालेस्टिनी राज्यलाई ‘अस्तित्वको खतरा’ का रूपमा विरोध गर्न मतदान गरेको छ ।
इजराइली प्रधानमन्त्री बेन्यामिन नेतान्याहुले सांसदहरूलाई सेनाले हमासको संवेदनशील क्षेत्रमा आक्रमण गरेको बताउनुभएको एक दिनपछि संसद्ले मतदान गरेको हो ।
प्यालेस्टिनी नेतृत्व र अन्तर्राष्ट्रिय समुदायबाट तीव्र आलोचना भएको उक्त मतदान धेरै हदसम्म प्रतीकात्मक छ तर आगामी बुधबार अमेरिकी कांग्रेसमा नेतान्याहुको नियोजित सम्बोधनअघि यो एउटा सङ्केत हो ।
अनुभवी नेतान्याहुले गाजाका लागि युद्धविराम र बन्धकहरूको रिहाइ सम्झौताको मध्यस्थता गर्ने अमेरिकी प्रयासमा कम रुचि देखाउनुभएको छ । उहाँले हमासमाथि ‘पूर्ण जित’ पहुँचभित्र रहेको भन्दै सैन्य दबाब बढाउने वाचा गर्नुभएको छ ।
इजराइलले हालका दिनहरूमा व्यापक बमबारी जारी राख्दा गाजामा जमिनमा हमास शासित क्षेत्रको स्वास्थ्य मन्त्रालयले पछिल्लो २४ घन्टामा ५४ जनाको मृत्यु भएको बताएको छ ।
इजराइली सांसदहरूले चाँडै पारित गरेको प्रस्तावमा इजराइली सेनाले कब्जा गरेको भूमिमा प्यालेस्टिनी राज्यले ‘इजराइल–प्यालेस्टिनी द्वन्द्वलाई निरन्तरता दिने र यस क्षेत्रलाई अस्थिर बनाउने’ बताइएको छ ।
अक्टोबर ७ मा इजराइलमाथिको आक्रमणपछि प्यालेस्टिनी राज्यलाई ‘प्रवर्द्धन’ गर्नाले ‘हमास र उसका समर्थकहरूलाई मात्र बढावा हुने’ प्रस्तावमा भनिएको छ । एक सय २० सदस्यीय संसद्मा उक्त प्रस्ताव नौका विरुद्ध ६८ मतले पारित भएको छ ।
प्यालेस्टिनी प्राधिकरणले इजराइलको कट्टर–दक्षिणपन्थी सत्तारूढ गठबन्धनमाथि ‘क्षेत्रलाई रसातलमा धकेलेको’ आरोप लगाएको छ । फ्रान्सले मतदानप्रति ‘आश्चर्य’ प्रकट गर्दै उक्त प्रस्ताव संयुक्त राष्ट्रसङ्घीय सुरक्षा प्रस्तावहरूको ‘विरोधाभास’ का रूपमा आएको बताएको छ ।
