पोखरा, २८ मंसिर । औद्योगिक क्षेत्र व्यवस्थापन लिमिटेड संचालक समितिले पोखरा औद्योगिक क्षेत्र भित्र रहेको जग्गाको भाडादर सात सय प्रतिशतले वृद्धि गरेपछि उद्योगीहरु आन्दोलित बनेका छन् ।
संचालक समितिको बैठकले वि.स. २०७५ श्रावण १ गते देखी वृद्धि भाडादर लागु गर्ने भनी गरिएको एकपक्षीय निर्णय तत्काल खारेज गर्न उद्योगीहरुले माग गरेका हुन् । औद्योगिक क्षेत्र भित्रका उद्योगीहरुको संस्था पोखरा औद्योगिक क्षेत्र उद्योग संघद्धारा बुधबार आयोजित पत्रकार सम्मेलनमा उद्योगीहरुले अस्वभाविक रुपमा वृद्धि गरिएको भाडादर कुनै पनि स्वीकार नहुने बताएका छन् ।
ऐन कानून विपरीत उद्योगी तथा देशको अर्थतन्त्रलाई नै धरासायी बनाउने गतल मनासयले गरिएको भाडा वृद्धि तत्काल फिर्ता लिन उनीहरुले माग गरेका छन् । पोखरा औद्योगिक क्षेत्र व्यवस्थापन कार्यालय पोखराले प्रतिरोपनी जग्गाको भाडादर प्रतिवर्ष ८ हजार तीन सय २८ रुपैयाँ लिँदै आएको र वि.स. २०७५ श्रावणदेखी छुटेको भन्दै प्रतिरोपनी वार्षिक ५४ हजार रुपैयाँ भाडादर निर्धारण गरी पत्र पठाइएको प्रति उनीहरुले आपत्ति प्रकट गरेका हुन् ।
उद्योगीहरुले गत असारसम्मको भाडा बुझाँइसकेको बताएका छन् । पोखरा औद्योगिक क्षेत्र व्यवस्थापन कार्यालयका प्रमुख किशोर कुमार पाण्डेले तत्कालीन संचालक समितिले वि.स. २०७५ श्रावणदेखी जमिनको भाडा वृद्धि गरेको र त्यतिवेलाका उद्योगमन्त्री मात्रिका यादबको एकल निर्णयले कार्यान्वयन नगर्नु भनेका कारण वृद्धि भाडादर उठाउन नसकिएको र हाल त्यही समयदेखिको वृद्धि भाडा बुझाउन पत्र लेखिएको बताउनुभयो ।
पत्रकार सम्मेलनमा बोल्दै संघका अध्यक्ष सुरेशकुमार श्रेष्ठले मुलुकको अर्थतन्त्र गम्भीर अवस्थामा रहेका बेला उद्योगहरुलाई बचाउन सहजीकरण गर्नुको साटो ७ सय प्रतिशत सम्म भाडा वृद्धि गरिनु उद्योगहरुलाई बन्द गराउने नीति संचालक समितिको रहेको बताउनुभयो । साथै उहाँले उक्त भाडादर खारेजीको माग गर्दै समान र वैज्ञानिक भाडादर कायम हुनुपर्ने र व्यवस्थापन पक्षले निर्णय फिता नलिए संघले थप सशक्क्त आन्दोलन गर्ने समेत चेतावनी दिनुभयो ।
व्यवस्थापन कार्यालयबाट गत कात्र्तिक २९ गते असार २२ को निर्णयको हवला दिँदै २०७५ साउन १ देखि कायम गरिएको करिब ७ सय प्रतिशत सम्मको भाडवृद्धि र प्रत्येक आर्थिक वर्षमा ५ प्रतिशतले वार्षिक भाडा वृद्धिसहितको रकम दाखिला गर्न भनेपछि उद्योगीहरुले झस्किएको भनाई श्रेष्ठको छ ।
उद्योगहरु संचालन गर्ने क्रममा प्रत्येक दुई दुई वर्षमा १५ प्रतिशतका दरले भाडा वृद्धि गर्ने सम्झौता रहेको भनाई उद्योगीहरुको छ । उक्त सम्झौता अनुसारको भाडा बुझाउन हामी तयार रहेको प्रदेश उद्योग परिसंघ गण्डकीका अध्यक्ष विनोद शर्मा न्यौपानेको भनाई छ ।
पोखरा उद्योग वाणिज्य संघका वरिष्ठ उपाध्यक्ष एवं संघका सल्लाहकार गोकर्ण कार्कीले बैंकिङ तरलता, कोभिड लगायतका कारण उद्योगी व्यवसायीहरु समस्यामा रहेका वेला राज्यले दुःख दिने काम गरेको बताए । वैज्ञानिक भाडादर कायम भए व्यवसायीहरु भाडा तिर्न तयार रहेको उहाँको भनाई छ ।
संघका प्रथम उपाध्यक्ष रुद्रलाल श्रेष्ठले कच्चा पदार्थदेखि हरेक बस्तुमा महंगी बढेर उद्योग धन्दाहरु सञ्चालन गर्न कठिनाइ भइरहेको गुनासो गर्नुभयो । संघका द्धितीय उपाध्यक्ष दीपेन्द्र बस्ताकोटीले उद्योग तथा कलकारखानाहरुको सुरक्षाका लागि बस्दासमेत त्यसलाई बाहिर अतिरञ्जित गरिएको गुनासो गर्नुभयो ।
विरोध स्वरुप संघले पहिलो चरणको आन्दोलन अन्तर्गत मंसिर २५ गते सबै उद्योगमा एकल भाडादर तथा वार्ता र सहमतिमा उद्योगमैत्री भाडादर निर्धारणको माग गर्दै शान्तिपूर्ण आन्दोलन गरेको थियो । वि.सं. २०३१ सालमा नेपाल सरकारको लगानीमा स्थापना भएको औद्योगिक क्षेत्र ५ सय १ रोपनी क्षेत्रफलमा फैलिएको छ । हाल पोखार औद्योगिक क्षेत्रमा ७७ वटा उद्योग संचालनमा रहेको र ३ हजार ५ सय जनाले प्रत्यक्ष रोजगारी पाएको सो अवसरमा बताइएको छ । यो क्षेत्रको राजश्वमा बार्षिक करिब ५० करोड योगदान रहेको जानकारी उद्योगीहरुले दिए ।
