पोखरा, १ मंसिर पोखराको लेखनाथ स्थित जनप्रकाश उच्च मावि मतदान स्थलको मतदान केन्द्र (घ) लाई महिला मैत्री केन्द्र बनाइएको छ । ६ वटा निर्वाचनमा मतदान अधिकृतको जिम्मेवारी बटुलीसक्नुभएकी गीता न्यौपानेको नेतृत्वमा सहायक मतदान अधिकृतसहित ८ जना महिला कर्मचारी खटाइएको छ । प्रदेश निर्वाचन कार्यालय गण्डकी, पोखराका निर्वाचन अधिकृत हुमप्रसाद पराजुलीले जनप्रकाश मावि मतदान स्थलको एक मतदान केन्द्रलाई महिला मैत्री बनाइएको जानकारी दिनुभयो ।
कास्की निर्वाचन क्षेत्र नं १ अन्तरगतको उक्त मतदान स्थलको घ मतदान केन्द्रमा ८ सय भन्दा वढी मतदाता रहेको जानकारी निर्वाचन कार्यालयले दिएको छ । कास्की निर्वाचन क्षेत्र नं १ को निर्वाचन अधिकृतको कार्यालयबाट बिहीबार निर्वाचन सामग्री बुझ्दै मतदान अधिकृत न्यौपानेले भन्नुभयो– जसरी निर्वाचन कार्यालयले महिला मैत्री मतदान केन्द्रको नेतृत्व गर्ने जिम्मेवारी दिएको छ त्यसरी नै उत्कृष्ट मतदान अधिकृतको रुपमा आफूलाई उभ्याउने उहाँले बताउनुभयो ।
उक्त केन्द्रबाट मतदान गर्ने हरेक मतदाताले सहज, भएरहित, निश्पक्ष, र स्वच्छ रुपमा मतदान गर्ने वातावरण सृजना गर्ने प्रतिवद्धतासमेत उहाँले व्यक्त गर्नुभयो । उक्त मतदान केन्द्रमा मतदान अधिकृत न्यौपानेसहित आठै जना स्वास्थ्य क्षेत्रका कर्मचारी हुन् । संचारकर्मीसँग कुरा गर्दै न्यौपानेले भन्नुभयो– हामी सबै स्वास्थ्य क्षेत्रका कर्मचारी हौं मतदानको समयमा कुनै मानिस अचानक बिरामी परेमा प्राथामिक उपचार समेत गर्न सक्छौ ।
