पोखरा, २८ कात्तिक । कास्की निर्वाचन क्षेत्र नं २ मा गठबन्धनका तर्फबाट प्रतिनिधिसभा सदस्य उम्मेदवार श्रीनाथ बरालले आफूले निर्वाचन जितेमा डेढ वर्षभित्र सुकुम्बासी र अव्यवस्थित बसोबासीका समस्या समाधान गर्ने प्रतिवद्धता व्यक्त गर्नुभएको छ । पोखरा–१५ स्थित कोलपाटनमा सोमबार आयोजित चुनावी कोणसभालाई सम्बोधन गर्दै उहाँले यस्तो प्रतिवद्धता व्यक्त गर्नुभएको हो । नेकपा (एकीकृत) समाजवादीका नेता बरालले सुकुम्वासीलाई व्यवस्थितसँगै सिङगो कास्कीको विकासलाई अगाडि वढाउने प्रतिवद्धता मतदातामाझ उहाँले गर्नुभएको छ ।
पर्यटकीय नगरी पोखरालाई प्रकृतिक सम्पदायुक्त पूर्वाधार निर्माणसँगै कास्कीका ताल संरक्षण, फराकिलो सडक निर्माण गर्ने आफ्नो योजना रहेको बरालले सुनाउनुभयो । ‘पोखरा आफैमा प्राकृतिक सौन्दर्यताले भरिपूर्ण सहर हो । अझ क्षेत्र नम्बर २ को कुरा गर्दा यहाँको विकासले समग्र कास्कीको विकासको प्रतिनिधित्व गर्छ । यहाँ हुने विकास निर्माण प्रकृतिमैत्री हुनुपर्छ । यहाँ रहेका सकुम्बासी समस्या, अव्यवस्थित बसोबासीका समस्या हामी डेढवर्ष भित्र समाधान गर्दै समग्र विकासमा अगाडि बढ्छौं’ बरालले भन्नुभयो ।
उम्मेदवार बरालले कृषिमा आधुनिकिकरण, बालबालिका र महिला केन्द्रित कार्यक्रमका साथै विकास र समृद्धिमा विशेष पहल गर्दै पोखरालाई शैक्षिक हवको रुपमा विकास गर्ने प्रतिबद्धतासमेत व्यक्त गर्नुभएको छ । समाजवाद उन्मुख स्वास्थ्य सेवा प्रवाह, पोखरा बसपार्कलाई इन्ट्रनल बसपार्कको रुपमा विकास गर्ने, लेखनाथको लामे आहालको बसपार्कलाई अन्तर्राष्ट्रिय स्तरको प्रादेशिक बसपार्कको रुपमा विकास गर्न स्थानीय तह, गण्डकी सरकार र केन्द्र सरकारसंग सहकार्य गर्ने प्रतिवद्धता समेत उहाँले मतदातामाझ गर्नुभएको छ ।
नेकपा माओवादीका नेता एवं गठबन्धनको तर्फबाट कास्की निर्वाचन क्षेत्र नम्बर २(१)मा प्रदेशसभा सदस्य पदका उम्मेदवार विश्वप्रकास लामिछानेले अबको लडाई गरिवी विरुद्धको रहेको बताउनुभएको छ । देशमा राजनीतिक परिवर्तन आएको र अब विकास र समृद्धिका लागि काम गर्ने बेला भएको उहाँको भनाई थियो ।
