काठमाडौं । पूर्वप्रधानमन्त्री बाबुराम भट्टराईले संयुत्तः सरकार बनाउनुपर्ने बताएका छन् । भट्टराईले संसदको कार्यकालसम्म प्रमुख दलहरूको संयुक्त सरकार निर्माण गर्नुपर्ने बताएका छन् । प्रमुख दलहरूको संयुक्त सरकार बनेमा संविधान र कानुनमा आवश्यक सुधार, शान्ति प्रक्रियाका बॉकी कामको समापन गर्न सकिने उनको भनाइ छ ।
माओवादी, जसपा, एकीकृत समाजवादी र विप्लव नेकपा मिलेर समाजवादी मोर्चा बनाएको र त्यसमा आफूलाई नसमेटेपछि असन्तुष्ट बाबुरामले संयुक्त सरकारको माग गर्न थालेका हुन् ।
शुक्रबार सामाजिक सञ्जाल ट्वीटरमा भट्टराईले लेखेका छन्, ‘यो संसदको कार्यकालसम्म प्रमुख दलहरूको संयुक्त सरकार निर्माण,संविधान र कानूनमा आवश्यक सुधार,शान्तिप्रकृयाका बॉकी कामको समापन,थप जटील बन्दै गएको भूराजनीतिको कुशल व्यवस्थापन,जनसरोकारका तात्कालिक मुद्दाहरूको सम्बोधन गर्दा ठीक होला कि रु नत्र समयले कसैलाई नपर्खन सक्छ ।’
भट्टराईले पालैपालो कुर्सी साटासाटमा समय खेर फाल्नुसट्टा प्रमुख दलहरूको संयुक्त सरकार बनाउँदा उपयुक्त हुने तर्क पनि पेस गरेका छन् । ‘गत आमचुनावयताको नेपाली राजनीतिको दिशा र गति झनझन् उतारचढावपूर्ण बन्दै जानु देश र जनताकोनिम्ति हितकर छैन ।
विद्यमान निर्वाचन प्रणालीमा अन्तर्निहीत अस्थीरता, दलका प्रमुख नेताहरूको अल्पदृष्टि र असीमित महत्वाकांक्षा, भूराजनीतिको निरन्तर दृश्यअदृश्य दबाब, राज्यका स्थायी अंगहरूको क्षयीकरण र भ्रष्टीकरण आदि यसका प्रमुख कारण हुनसक्छन् ।’
बिहीबार मात्रै उनले २०८४ को निर्वाचनमा नयाँ दलको सरकार बन्ने भविष्यवाणी गरेका थिए । उनले कांग्रेस, एमाले र माओवादीको सरकार नबन्ने ठोकुवा नै गरेका छन् ।
