विश्वप्रसिद्ध आहार विशेषज्ञ ग्राहमको अनुभवमा मनुष्यलाई जति पनि पोषकतत्वहरु चाहिन्छन्, ती मूलतः वृक्ष, वनस्पतिबाट प्राप्त हुन्छन् । प्रकृतिमा जुन रुपमा उपलब्ध हुन्छ, त्यसको गुणात्मक स्वरुप नबिगारी जस्ताको तस्तै खाने हो भने कुनै तत्वको कमी हुने प्रश्नै उठ्दैन ।
– मूलतः प्राकृतिक खाद्यपरिकारमा नै उच्च कोटिको मौलिक एवम् अनिवार्य पोषण शक्ति विद्यमान रहन्छ ।
– काँचो खानेकुरामा रोगप्रतिरोधात्मक क्षमता उच्च हुन्छ साथै अर्काे सर्वाधिक उपयोगी कुरा, त्यो पचाउनका लागि अत्यन्त सजिलो हुन्छ ।
– काँचो फलफूल, तरकारी खाँदा निकै चबाउनुपर्ने हुँदा दाँतको पर्याप्त व्यायाम हुनुका साथै मुखमा यथेष्ट पाचक रस निस्कन्छ ।
– अपक्वाहारमा कृत्रिमता र मिलावटको सम्भावना न्यून हुन्छ ।
– नपकाएको खानेकुरा शीतल र पेटका लागि आरामदायी हुन्छ भने त्यसको पाचन पनि शीघ्र हुन्छ ।
– काँचोकचिलो खानेकुराले दाँत र आमाशयको क्षति रोक्दछ ।
– अपक्वाहार स्वयम्मा प्राणवान्, सजीव एवम् जीवन्त आहार हो ।
– नपकाई खान मिल्ने खानेकुरामा प्राकृतिक स्वाद र रस भरिपूर्ण हुने हुँदा खानमा स्वादिष्ट हुन्छ ।
– निकै बेर चबाउनुपर्ने र प्राकृतिक स्वाद लिँदै खानुपर्ने हुनाले अति भोजनको डर रहन्न ।
– काँचोकचिलो खाना पकाएर राखेको खानाझैँ चाँडो गन्हाउने, कुहिने, बिग्रने, सड्ने नहुनाले हितकारी हुन्छ ।
– काँचो खानेकुरामा जैविक तत्व जीवन्त हुने हुनाले पेटमा समुचित पाचन रस निकाल्ने र पचाउने आन्तरिक पाचकक्रिया पद्धति चुस्तदुरुस्त रहन्छ ।
– अपक्वाहार सेवन गर्ने व्यक्तिको पेटबाट मलविकार बाहिर निस्कने क्रममा त्यसको रेसाले बढीभन्दा बढी मलविकार बाहिर निकालिदिन्छ ।
साभारः ‘खाने कसरी पिउने कसरी’ पुस्तकबाट
