काठमाडौं । देवताकै नाममा भ्रष्टाचार हुन्छ भन्दा कसैलाई पनि विश्वास नलाग्न सक्छ । तर, हिन्दु धर्मावलम्बीको आस्थाको केन्द्र पशुपतिनाथ मन्दिरमा त्यस्तै हुँदै आएको छ ।
पशुपतिनाथ मन्दिर परिसरमा अनेक नाममा भ्रष्टाचार हुँदै आएको सार्वजनिक सञ्चार माध्यमबाट बेलाबेला सार्वजनिक हुँदै आएको छ । पछिल्लो समय भने ‘दान पेटिका’बाटै भ्रष्टाचार हुने गरेको खुलासामा भएको छ ।
पशुपतिनाथ मन्दिरभित्र एउटा दान पेटिका राखिएको छ । मूल मन्दिरमा पूजा गर्न पुग्ने दर्शनार्थीले उक्त पेटिकामा चाहेअनुसारको दान गर्दै आएका छन् । सोही दान पेटिका बेलाबेला गायब हुने गरेको छ ।
करिव १ महिना अगाडि सोही दान पेटिका २ घण्टा गायब गरिएको छ । दान पेटिका गायब भएको घटना गुपचुप राख्न खोजिएको थियो । तर, दानपेटिका गायब पारिएको घटना पशुपति क्षेत्रमा फैलिएपछि घटनालाई साम्य पार्न पशुपति क्षेत्र विकास कोषले छानविन समिति गठन गरेको बुझिएको छ । तर, कोषले अहिलेसम्म प्रतिवेदन सार्वजनिक गरेको छैन ।
कोषका सदस्य सचिव डा। मिलनकुमार थापा दान पेटिका दुई घण्टासम्म हराएको स्वीकार गर्छन् । र, छानविन भइरहेको बताउँछन् । सदस्य सचिव थापाले भने– ‘करिव एक महिना अगाडि दान पेटिका दुई घण्टासम्म हराएको हो । हामीले छानविन समिति गठन गरेका छौं । समितिले तयार पारेको प्रतिवेदन छिट्टै सार्वजनिक गर्छौ ।’
स्रोतका अनुसार समितिले कोषलाई प्रतिवेदन बुझाइसकेको छ । छानविनका क्रममा मिलेमतोकै आधारमा दान पेटिका गायब बनाइएको तथ्यहरु फेला परेको छानविन समितिका एक सदस्यले बताए । उनले भने– ‘यो काममा कोषको उच्च नेतृत्वदेखि सुरक्षाकर्मी र मन्दिरभित्र काम गर्ने सामान्य कामदारसम्मको मिलेमतो देखिएको छ । हामीले सोही अनुसार प्रतिवेदन बुझाएका छौं ।’
दान पेटिका गायब हुँदा कति रकम हरायो भन्ने कसैलाई थाहा छैन । किनकी, पशुपतिमा डिजिटल दानको मात्रै दान गर्ने वित्तिकै थाहा हुन्छ । पेटिकामा राखिने दान भने एकैपटक गन्ने गरिन्छ ।
छानविन समितिको प्रतिवेदन सार्वजनिक हुँदा आफै अप्ठ्यारोमा परिने डरले कोषका नेतृत्वले समितिको प्रतिवेदन सार्वजनिक गर्न नसकेको समितिका ति सदस्यले बताउँछन् ।
मूल मन्दिरको सुरक्षाको जिम्मा नेपाल प्रहरी र सशस्त्र प्रहरीलाई दिइएको छ । मूल मन्दिर परिसरमा चौबीसै घण्टा सुरक्षाकर्मी तैनाथ हुन्छन् । तर, सुरक्षाकर्मीको बाक्लो घेराबाटै दान पेटिका गायब भएपछि सुरक्षाकर्मी समेत मिलेमतोमा रहेको बुझ्न मुस्किल पर्दैन ।
मन्दिरभित्र सीसीटीभी जडान गरिएको भए पनि उक्त सीसीटीभीले काम गरिरहेको छ या छैन भन्ने अहिलेसम्म कसैलाई थाहा छैन । त्यसैले मिलेमतोमै दान पेटिका गायव गरिएको आशंका गरिएको छ । मन्दिरभित्र सर्वसाधारणलाई क्यामेरा प्रयोग गर्न निषेध गरिएको छ ।
धार्मिकस्थल पशुपतिमा ठूलो मात्रामा भ्रष्टाचार हुँदै आएको केही समय अगाडि पर्यटनमन्त्री सुदन किरातीले नै खुलासा गरेका थिए ।
मन्त्री बनेपछि पशुपतिनाथ अनुगमन गर्न पुगेका मन्त्री किरातीले भ्रष्टाचारका लागि लाखौंको डिल हुने गरेको सुनेको भन्दै कारबाही गर्ने चेतावनी दिएका थिए ।
हाल डा. मिलनकुमार थापा पशुपति क्षेत्र विकास कोषको सदस्य सचिव छन् । थापाकै नेतृत्वमा पशुपति क्षेत्रमा अनियमितता भइरहेको समेत आरोप लाग्ने गरेको छ ।
पशुपति क्षेत्र आसपासका विभिन्न कामका लागि हुने बोलपत्र लगायतमा समेत चलखेल हुने गरेको बुझिन्छ । पछिल्लो समय कोषले भिडियोग्राफीसम्बन्धी दुई वटा बोलपत्र आह्वान गरेको छ । कोषले बोलपत्र आह्वान गरेसँगै उक्त काम हातपार्न गिरोहरु सक्रिय भएको समेत बुझिएको छ ।
