रसुवा। जनैपूर्णिमाका अवसरमा गोसाइँकुण्ड मेला भर्न आउने तीर्थयात्रीलाई लक्षित गर्दै पदमार्गमा सञ्चालित होटल तथा लजको सेवा शुल्क निर्धारण गरिएको छ।
जिल्ला प्रशासन कार्यालय रसुवाको समन्वयमा सरोकारवाला निकाय तथा व्यवसायीको सहभागितामा गत वर्षकै आधारमा चिया, नास्ता, खाना तथा लजको शुल्क तोकिएको हो।
निर्धारित दरअनुसार धुन्चे–घट्टेखोला आसपासमा एक कप चियाको मूल्य ३० रुपैयाँदेखि गोसाइँकुण्डमा ८५ रुपैयाँसम्म तोकिएको छ। त्यस्तै, दालभात–तरकारीको शुल्क २७५ रुपैयाँदेखि ६०० रुपैयाँसम्म तथा लजमा सुत्नका लागि ३०० रुपैयाँदेखि ६०० रुपैयाँसम्म शुल्क निर्धारण गरिएको छ।
बजार अनुगमन समितिका संयोजक एवं रसुवाका सहायक प्रमुख जिल्ला अधिकारी द्रुवप्रसाद अधिकारीका अनुसार तोकिएको दरभन्दा बढी शुल्क लिन पाइने छैन। होटल तथा लज सञ्चालकले उपभोक्ताले स्पष्ट रूपमा देख्ने गरी सेवा शुल्कको सूची अनिवार्य रूपमा राख्नुपर्ने व्यवस्था गरिएको छ।
तीर्थयात्रीसँग तोकिएकोभन्दा बढी शुल्क लिएको पाइए सम्बन्धित निकायमा जानकारी गराउन आग्रह गर्दै अधिकारीले भने, ‘पवित्र गोसाइँकुण्ड मेला भर्न आउने तीर्थयात्रीको हितलाई ध्यानमा राखेर शुल्क निर्धारण गरिएको हो। सरोकारवाला सबै पक्षको सहयोग र सहकार्यमा सुरक्षा, स्वास्थ्य, यातायात, सरसफाइ तथा खाद्यान्न व्यवस्थापनलगायतका तयारी पूरा भएको छ।’
वर्षायाम भएकाले मौसमको अवस्थालाई ध्यानमा राखेर यात्रा गर्न उनले तीर्थयात्रीलाई आग्रह गरेका छन्।
यस वर्ष गोसाइँकुण्ड मेला भर्न १० हजारभन्दा बढी तीर्थयात्री आउने अपेक्षा गरिएको धुन्चेस्थित बौद्ध धर्मगुरु लामा रेञ्जन घलेले जानकारी दिए।
संविधानसभा सदस्य छोवाङ तेन्जिङ तामाङले सरकारी तथा गैरसरकारी संघ–संस्था, नागरिक समाज र व्यवसायीको सहयोग, समन्वय तथा सहकार्यमा तीर्थयात्रीलाई सहज हुने गरी आवश्यक व्यवस्थापन गरिएको बताए।
