स्वास्थ्य बिमामार्फत उपलब्ध गराइने र निजी औषधि पसलहरूमा बिक्री हुने औषधिको गुणस्तरमा कुनै भिन्नता नरहेको पाइएको छ।
प्रधानमन्त्री तथा मन्त्रिपरिषद्को कार्यालयले राष्ट्रिय सतर्कता केन्द्रसँगको समन्वयमा गरेको तुलनात्मक गुणस्तर विश्लेषणले दुवै माध्यमबाट उपलब्ध औषधिहरू समान रूपमा गुणस्तरीय र स्वीकृत मापदण्डअनुसार रहेको देखाएको हो।
नेपाल औषधि लिमिटेडमा गरिएको प्रयोगशाला परीक्षणमा मुटुरोग र मधुमेहका औषधिहरूको प्रभावकारिता तथा भौतिक गुणस्तरमा कुनै क्लिनिकल भिन्नता नभेटिएको प्रतिवेदनमा उल्लेख छ।
प्रधानमन्त्रीका स्वकीय उपसचिव प्रकृति ढकालका अनुसार बजारमा व्यापक प्रयोग हुने औषधिहरू सङ्कलन गरी उत्पादक कम्पनी तथा स्रोत (बिमा वा निजी) को पहिचान लुकाएर परीक्षणका लागि पठाइएको थियो।
उच्च रक्तचापका लागि प्रयोग हुने ‘एम्लोडिपिन ५ एमजी’ र मधुमेहका लागि प्रयोग हुने ‘मेटफर्मिन एचसीएल ५०० एमजी’ का नमूनाहरू परीक्षण गरिएको थियो।
एम्लोडिपिनको पोटेन्सी, कन्टेन्ट युनिफर्मिटी तथा घुलनशीलता दुवै स्रोतका नमूनामा मापदण्डअनुसार समान र सन्तोषजनक पाइएका छन्।
त्यस्तै, मेटफर्मिनको सस्टेन्ड रिलिज प्रक्रियासमेत दुवै नमूनामा समान रूपमा प्रभावकारी देखिएको प्रतिवेदनमा उल्लेख छ। एक, तीन र दश घण्टाको परीक्षणमा दुवै नमूनाले लगभग समान परिणाम दिएका छन्।
नेपाल औषधि लिमिटेडकी क्वालिटी एश्योरेन्स इञ्चार्ज हिना श्रेष्ठका अनुसार परीक्षण अन्तर्राष्ट्रिय प्रोटोकल र फार्माकोपियाको मापदण्डअनुसार अत्याधुनिक उपकरण प्रयोग गरी गरिएको हो।
सबै परीक्षणका परिणामले दुवै प्रकारका औषधि पूर्ण रूपमा सुरक्षित, प्रभावकारी र समान गुणस्तरका रहेको देखाएको प्रतिवेदनमा उल्लेख छ।
अनुसन्धान निष्पक्ष बनाउन औषधिको ब्रान्ड र स्रोत गोप्य राखेर परीक्षण गरिएको थियो। यस नतिजाले स्वास्थ्य बिमामार्फत उपलब्ध औषधिको गुणस्तरबारे देखिएका शङ्का र भ्रम हटाउन सहयोग पुग्ने सरकारी अधिकारीहरूले बताएका छन्।
