काठमाडौं । नेपालमा यो वर्ष (सन् २०२६) कीर्तिमान कायम हुने गरी पर्यटक भित्रिने भएका छन् । सन् २०२६ को १० महिना (जनवरी–अक्टोबर) मा १० लाख ८ हजार ६ सय पर्यटक भित्रिएको नेपाल पर्यटन बोर्डले सार्वजनिक गरेको अध्यागमन विभागको तथ्यांकले देखाएको छ ।
तथ्यांकअनुसार १० महिनाको पर्यटक आगमन गत वर्षको सोही अवधिको तुलनामा ६४ हजार ९ सय अर्थात् ६.८७ प्रतिशतले बढेको छ । गत वर्ष सन् २०२५ को १० महिनामा ९ लाख ४३ हजार ७ सय पर्यटक नेपाल भित्रिएका थिए ।
नेपालमा हालसम्म आएका पर्यटक र अबका दुई महिनामा गत वर्षकै हाराहारीमा पर्यटक आउँदा पनि संख्या साढे १२ लाख पुग्ने अनुमान नेपाल पर्यटन बोर्डले गरेको छ ।
गत वर्ष सन् २०२५ मा कुल ११ लाख ५८ हजार पर्यटक नेपाल आएका थिए । यो वर्ष अबका दुई महिना (नोभेम्बर र डिसेम्बर) मा गत वर्षकै जति (२ लाख १४ हजार) मात्रै पर्यटक भित्रिए पनि कुल संख्या करिब साढे १२ लाख पुग्ने देखिएको छ ।
नेपालमा हालसम्म सबैभन्दा धेरै पर्यटक सन् २०१९ मा आएका थिए । उक्त वर्ष ११ लाख ९७ हजार पर्यटक नेपाल भित्रिएका थिए ।
यो वर्ष भने साढे १२ लाख पुग्ने देखिएकाले हालसम्मकै उच्च संख्यामा पर्यटक नेपाल भित्रिएर नयाँ कीर्तिमान कायम हुने अनुमान गरिएको छ ।
यो वर्ष सन् २०२६ को अक्टोबरसम्ममा सबैभन्दा धेरै पर्यटक भारतबाट आएका छन् । भारतबाट १ लाख ८७ हजार पर्यटक भित्रिएका छन् भने हाल पर्यटकीय सिजन भएकाले नोभेम्बर र डिसेम्बरमा अझै धेरै पर्यटक भारतबाटै आउने अनुमान गरिएको छ ।
नेपालमा धेरै पर्यटक भित्रिने मुलुकको सूचीमा दोस्रो स्थानमा रहेको चीनबाट ७७ हजार र तेस्रो स्थानमा रहेको अमेरिकाबाट ६९ हजार पर्यटक नेपाल आएका छन् ।
नेपाल भित्रिएका पर्यटकमध्ये सार्क मुलुकबाट २ लाख ५५ हजार, एसियाका अन्य मुलुकबाट १ लाख ४५ हजार, युरोपबाट १ लाख १७ हजार, ओशिनियाका प्रमुख दुई देश अस्ट्रेलिया र न्युजिल्यान्डबाट ३२ हजार, अमेरिकी मुलुकबाट ९२ हजार, मध्यपूर्वबाट १० हजार र अफ्रिकी मुलुकबाट ३२ हजार पर्यटक नेपाल भित्रिएको सन् २०२६ को जनवरीदेखि अक्टोबरसम्मको तथ्यांकले देखाएको छ ।
