पोखरा, २० माघ । पोखरा–२१ निर्मलपोखरी स्थित फुकुओका विद्यालयका छात्रछात्रालाई शैक्षिक सामग्री वितरण गरिएको छ । पोखरा–१२ रानीपौवा स्थित आदर्श समाज सामाजिक संस्थाले आफ्नो ३२ औं वार्षिकोत्सवको अवसर पारेर उक्त विद्यालयका छात्रछात्रालाई शुक्रबार शैक्षिक सामग्री वितरण गरेको हो ।
उक्त विद्यालयमा अध्ययनरत ५८ जना छात्रछात्रालाई झोला, कापी र पेन्सील प्रदान गर्नुको साथै पाँच जना जेहेन्दार तथा विपन्न छात्रछात्रालाई जनही दुई हजार रुपैयाँका दरले प्रदान गरिएको जानकारी शैक्षिक सामग्री वितरण कार्यक्रम संयोजक ईन्दिरा कोइरालाले दिनुभयो ।
कार्यक्रमका प्रमुख अतिथि अग्रज पत्रकार शिरोमणि बरालले आर्थिक अभावका कारण कुनैपनि बालवालिका शिक्षाबाट वञ्चित हुन नहुने बताउनुभयो । साथै उहाँले सरकारले शिक्षा क्षेत्रमा लगानी वृद्धिगरी सबै बालवालिकामा शिक्षाको पहुँच पु¥र्याउन जोड दिनुभयो । अझैपनि केही प्रतिशत बालवालिका विद्यालय बाहिर रहेकाले उनीहरुलाई शिक्षा प्रदान गर्न सरकारले आफ्नो भूमिका प्रभावकारी बनाउन जरुरी भएको भनाई उहाँको थियो ।
संस्थाका अध्यक्ष लक्ष्मीदेवी कोइरालाले कठिन परिस्थितिमा पनि विद्यालय पुगेका छात्रछात्रालाई सहयोग पुगोस् भनेर नै शैक्षिक सामग्री प्रदान गरेको बताउनुभयो । उक्त विद्यालय व्यवस्थापन समितिका अध्यक्ष गंगादत्त पौडेलले १४ वर्ष अघि जापानिज संस्था फुकुओका एजुकेशन चिल्डेन कमिटी नामक संस्थाद्धारा विद्यालय संचालनमा ल्याइएको तर उनीहरुले दशवर्षसम्म सहयोग प्रदान गर्दै आएको र चारवर्षयता त्यस्तो सहयोग प्रदान गर्न छाडेपछि विद्यालयको अवस्था दयनीय बन्दै गएको बताउनुभयो ।
कुनैबेला दुई सय ८५ विद्यार्थी अध्ययन गर्ने उक्त विद्यालयमा अहिले ५८ जना विद्यार्थी मात्र अध्ययनरत छन् । गुठीद्धारा संचालित उक्त विद्यालयमा विदेशी संस्थाले सहयोग गर्न छाडेपछि शिक्षकलाई तलव दिन सक्ने अवस्थामा नरहेको भनाई उहाँको छ ।
चार वर्ष अघिसम्म कक्षा दशसम्म पढाइहुने उक्त विद्यालयमा अहिले नर्सरीदेखी पाँच कक्षासम्म मात्र पढाई हुने गरेको छ । विद्यार्थी नभएकै कारण पाँच कक्षासम्म मात्र अध्यापन गराइएको जानकारी अध्यक्ष पौडेलले दिनुभयो । शैक्षिक सामाग्री वितरण कार्यक्रममा विद्यालयका प्रअ चन्द्रकला भण्डारीले विद्यालयको आयश्रोत नहुँदा शिक्षकलाई तलब दिन नसकिएको बताउनुभयो ।
