काठमाडौँ, १८ पुस : आगामी निर्वाचनको सन्दर्भमा राष्ट्रिय स्वतन्त्र पार्टीले प्रतिनिधि सभा सदस्यका लागि समानुपातिक तर्फ नाम छनोट गरेपछि पनि चर्चित पर्वतारोहण उद्यमी टासी लाक्पा शेर्पाले उक्त पद अस्वीकार गर्दै राष्ट्रसेवाको फरक उदाहरण प्रस्तुत गर्नुभएको छ।
उहाँले सार्वजनिक रूपमा जारी गर्नुभएको वक्तव्यमा सबै राजनीतिक दल तथा योग्य उम्मेदवारहरूलाई शुभकामना व्यक्त गर्दै, दलगत राजनीतिमा रुचि नराख्ने स्पष्ट धारणा राख्नुभयो। “म सधैं मेरो देशको उन्नतिका लागि आफ्नै तरिकाले सहयोग गर्न प्रतिबद्ध छु र एक साधारण नागरिकको रूपमा आफ्नो कर्ममार्फत देशका लागि योगदान दिन चाहन्छु,” उहाँको भनाइ छ।
14 Peak Expedition का सञ्चालकसमेत रहनु भएका टासी लाक्पा शेर्पा नेपालका विश्वचर्चित पर्यटन तथा साहसिक व्यवसायीमध्ये एक हुनुहुन्छ। चाहेमा उहाँ राजनीतिक यात्रामा गएर प्रभावशाली मन्त्रीसमेत बन्न सक्ने सम्भावना हुँदाहुँदै पनि पदभन्दा माथि जिम्मेवारी र सेवाको भावनालाई प्राथमिकता दिनुभएको छ।
राजनीतिक पदमा नभई पनि राष्ट्र निर्माणमा योगदान दिन सकिन्छ भन्ने सन्देश उहाँको निर्णयले दिएको छ। व्यापार, पर्यटन, रोजगारी र अन्तर्राष्ट्रिय स्तरमा नेपालको छवि निर्माणमा उहाँले निरन्तर पुर्याउँदै आएको योगदान नै उहाँको राष्ट्रप्रतिको सच्चा प्रतिबद्धताको प्रमाण हो।
टासी लाक्पा शेर्पाको यो निर्णय केवल व्यक्तिगत अस्वीकार होइन, यो एउटा गहिरो सन्देश हो ,राष्ट्रसेवा पदबाट होइन, नियत र कर्मबाट हुन्छ।
