सोलुखुम्बुको माप्यदुधकोशी गाउँपालिका–३ वाकुमा बोलेरो जीप दुर्घटना हुँदा तीन जनाको मृत्यु भएको छ।
प्रहरीका अनुसार घटनास्थलमा तीन जना महिलाको शव फेला परेको छ। माप्य दूधकोशी गाउँपालिका वडा नम्बर ६ र ७ को सिमानामा रहेको भिरकुना भन्ने ठाउँबाट गाडी सडकबाट करिब पाँचसय मिटर तल खसेर दुर्घटना भएको हो।
दुर्घटनामा महाकुलुङ गाउँपालिका ३ छेस्काम घर भएकी १६ वर्षीया हबी राई र सोही ठाउँकी २० वर्षीया शान्ति राईको मात्रै सनाखत भएको छ । मृतक एक किशोरीको पहिचान खुलेको छैन ।
दुर्घटनामा घाइते भएका गाडी चालक महाकुलुङ-३ घर भएका ३२ वर्षीय श्रीध्वज राईको अवस्था गम्भीर छ। उनी बोल्न सक्ने अवस्थामा छैनन् ।
बिहीबार साँझ साढे ६ बजेतिर माप्य दूधकोशी गाउँपालिकाबाट महाकुलुङ गाउँपालिकातर्फ जाँदै गरेको ११ जना सवार बोलेरो गाडी दुर्घटनामा परेको जिल्ला प्रहरी कार्यालय सोलुखुम्बुका डीएसपी मनोजित कुँवरले जानकारी दिए।
घाइतेहरुको जिल्ल अस्पताल फाप्लुमा उपचार भइरहेको प्रहरीले जनाएको छ। दुर्घटनामा दुईजना भने सकुशल छन्।
