किमाथाङ्का (सङ्खुवासभा)। सङ्खुवासभाको खाँदबारीस्थित जिल्ला कारागारमा क्षमता ५५ जना मात्र रहे पनि हाल १३९ कैदीबन्दी राखिएका छन् । क्षमताभन्दा करिब तीन गुणा बढी कैदीबन्दी हुँदा दैनिक जीवनयापन र गतिविधि सञ्चालनमा समस्या उत्पन्न भएको छ ।
कारागारका प्रमुख जेलर राजन घिमिरेका अनुसार अहिले १३१ पुरुष, आठ महिला कैदीबन्दी र दुई जना आश्रित बालबालिका छन् । “खानेपानी, सरसफाइ, बस्न र शौचालयमा निकै समस्या भइरहेको छ । पुरानो र साँघुरो भवन भएकाले कैदीबन्दीहरूको जीवनयापन कष्टकर बनेको छ,” घिमिरेले बताए ।
यो कारागार ३.५ रोपनी क्षेत्रफलमा फैलिएको भए पनि थप भवन निर्माणका लागि आवश्यक जग्गा नहुँदा क्षमता विस्तार गर्न नसकिएको उनको भनाइ छ । आपत्कालीन अवस्थामा उद्धार र सुरक्षामा पनि कठिनाइ हुने जेलर घिमिरेको भनाइ छ । “कारागार माथिल्लो भागमा रहेको छ, तलतिर भिरालो छ र वरिपरिको जमिन निजी व्यक्तिको भएको कारण सडक विस्तार गर्न सकिएको छैन,” उनले भने ।
हाल कारागार पुग्ने बाटो संकुचित भर्याङ (सिँढी) मात्र भएकाले एम्बुलेन्स, दमकल वा सुरक्षा निकायका गाडी तुरुन्तै प्रवेश गर्न नसक्ने अवस्था छ । कारागार सुधार तथा क्षमता वृद्धि गर्नका लागि पटक–पटक आग्रह गरे पनि हालसम्म सुनुवाइ नभएको जेल प्रशासनको गुनासो छ ।
