भारतको एयर इन्डियाले नेपालमा सञ्चालन सुरु गरेदेखि आफैंले गर्दै आएको ग्राउण्ड ह्यान्डलिङ जिम्मेवारी अब राष्ट्रिय ध्वजावाहक नेपाल एयरलाइन्स कर्पोरेसनलाई दिने भएको छ ।
यस व्यवस्थाअन्तर्गत एयर इन्डियाले ग्राउण्ड ह्यान्डलिङ सेवा सिधै नेपाल एयरलाइन्सलाई हस्तान्तरण तयारी गरेको छ । एयर इन्डियाले ग्राउण्ड ह्यान्डलिङको जिम्मेपारी नेपाल एयरलाइन्सलाई दिएपनि प्राविधिक सहयोग भने जारी राख्नेछ ।
ग्राउण्ड ह्यान्डलिङ सेवा प्रदान गर्ने सम्बन्धी द्विपक्षीय सहकार्य र सम्झौता प्रक्रिया अन्तिम चरणमा पुगेको छ ।
नेपाल एयरलाइन्सका प्रवक्ता सुबास डंगोलका अनुसार एयर इन्डिया अब नेपाल एयरलाइन्सलाई ग्राउण्ड ह्यान्डलिङ जिम्मेवारी हस्तान्तरण गर्न तयार छ । ‘यसको लागि दुबै एयरलाइन्सबीच औपचारिक सम्झौता छिट्टै हुनेछ’, डंगोलले भने ।
सम्झौता कहिले हुने निश्चित नभएपनि एयर इन्डियाद्वारा प्रदान गरिने सेवाहरू लिन नेपाल एयरलाइन्सले सहमति जनाइ सकेको छ ।
यसअघि थाई एयरवेजले पनि २९ अक्टोबर २०२३ मा सम्झौता गरेर आफ्नो ग्राउण्ड ह्यान्डलिङ सेवा नेपाल एयरलाइन्सलाई हस्तान्तरण गरिसकेको छ ।
नेपाल एयरलाइन्सले ग्राउण्ड ह्यान्डलिङ सेवा सुरु गरेपछि थाई एयरवेजले ८० युनिट ग्राउण्ड सपोर्ट उपकरण नेपाल एयरलाइन्सलाई हस्तान्तरण गरेको छ । थाई एयरवेजको सेवा ह्यान्डल गरेपछि नेपाल एयरलाइन्सको वार्षिक कारोबार ३ अर्ब रुपैयाँले बढेको छ ।
प्रवक्ता डंगोलकाअनुसार नेपाल एयरलाइन्सले एयर इन्डिया र अन्य अन्तर्राष्ट्रिय एयरलाइन्सको ग्राउण्ड ह्यान्डलिङ सेवा प्रदान गरेसँगै यसको आम्दानी आधार फराकिलो हुनेछ र निगम अझ विश्वसनीय बन्नेछ ।
हाल, नेपाल एयरलाइन्सले वार्षिक करिब ४ अर्ब रुपैयाँ ग्राउण्ड ह्यान्डलिङ सेवाबाट कमाइरहेको छ । थाई एयरवेज पहिले नै समावेश भइसकेको र थप अन्तर्राष्ट्रिय उडानहरू बढ्दै गर्दा यस वर्ष नेपाल एयरलाइन्सको ग्राउण्ड ह्यान्डलिङ आम्दानी ४.५ देखि ५ अर्ब रुपैयाँ पुग्ने अपेक्षा गरिएको छ ।
नेपाल नागरिक उड्डयन प्राधिकरण र सरकारले नेपाल एयरलाइन्सको ग्राउण्ड ह्यान्डलिङ सेवामा रहेको एकाधिकार हटाउने उड्डयन नीति पनि तयार गरिरहेको छ ।
नेपाल एयरलाइन्सले भने प्रतिस्पर्धा केवल सेवाको गुणस्तर सुनिश्चित गर्न मात्र हुनुपर्ने र यसको लामो समयदेखि रहेको जिम्मेवारी लिन नहुने तर्क गर्दै आएको छ ।
पर्यटन मन्त्रालयले तयार गरेको मसौदा उड्डयन नीतिमा नेपाल एयरलाइन्सको एकाधिकारमा रहेको ग्राउण्ड ह्यान्डलिङ सेवा गुणस्तरीय र प्रतिस्पर्धात्मक बनाउने उल्लेख छ ।
स्थापनाकालदेखि नेपाल एयरलाइन्सले ग्राउण्ड ह्यान्डलिङ सेवामा एकाधिकार राखेको छ । जसमा यात्रु र कार्गोको टर्मिनल र विमानबीचको ढुवानी समावेश छ । नयाँ व्यवस्थाअनुसार प्राधिकरणसँग नेपाल एयरलाइन्सबाट यो अधिकार लिन सक्ने छन् ।
यसअघि प्राधिकरणले नेपाल एयरलाइन्सको विरोधका कारण विफल भएका प्रयासहरूलाई पुनः नेपाल एयरलाइन्सको ग्राउण्ड ह्यान्डलिङ सेवा लिन खोजेको हो ।
सुरुमा प्राधिरकणले हिमालय एयरलाइन्सलाई नेपालबाट ३५ साप्ताहिक अन्तर्राष्ट्रिय उडानको लागि ग्राउण्ड ह्यान्डलिङ अनुमति दिन खोजेको थियो तर नेपाल एयरलाइन्सका कर्मचारीहरूको विरोधका कारण योजना असफल भएको थियो ।
मे २०२४ (जेठ २०८१) मा प्राधिकरणले भैरहवा विमानस्थलमा ग्राउण्ड ह्यान्डलिङमा प्रतिस्पर्धा अनुमति दिने निर्णय गरेको थियो । जसमा नेपाल एयरलाइन्ससँगै हिमालय एयरलाइन्स, बुद्ध एयर, श्री एयरलाइन्स र यती एयरलाइन्स समावेश गरिएको छ ।
