त्रिपोली। लिबियामा संयुक्त राष्ट्रको सहयोग मिसन (यूएनएसएमआईएल) ले राजधानी त्रिपोली आसपास सैनिक तथा भारी हतियारहरूको बढ्दो उपस्थितिप्रति गम्भीर चिन्ता व्यक्त गरेको छ ।
शनिबार प्रकाशित एक औपचारिक विज्ञप्तिमा, यूएनएसएमआईएलले यस्तो गतिविधिले सर्वसाधारणको सुरक्षा र दैनिक जीवनमा प्रतिकूल असर पार्न सक्ने उल्लेख गर्दै सबै पक्षलाई संयमता अपनाउन र वार्ताको माध्यमबाट समाधान खोज्न आग्रह गरेको छ ।
यूएनएसएमआईएलले थप भनेको छ,“जुन महिनादेखि त्रिपोलीमा भइरहेको सुरक्षा व्यवस्थासम्बन्धी छलफलमा उल्लेखनीय प्रगति भएको भए तापनि, सबै पक्षले वार्ता जारी राखेर निष्कर्षमा पुग्न अत्यावश्यक छ । तनाव बढाउने कुनै पनि कदमबाट बच्नुपर्नेछ ।”
त्रिपोलीमा पछिल्लो समय देखिएको सैनिक गतिविधिका कारण सर्वसाधारणमा त्रास फैलिएको जनाइएको छ । यदि यस अवस्थामा बल प्रयोग गरियो भने, घना बस्ती भएको क्षेत्रमा हिंसात्मक झडप हुने सम्भावना रहेको चेतावनी पनि विज्ञप्तिमा उल्लेख गरिएको छ ।
संयुक्त राष्ट्रले यसअघि मे महिनामा लिबियामा घोषणा गरिएको युद्धविरामलाई कायम राख्नका लागि सबै पक्षसँग निरन्तर संवाद र सहयोग गरिरहने प्रतिबद्धता व्यक्त गरेको छ ।
हालै राजधानीका केही भागमा सीमित झडप भएको जानकारीपछि सरकारका समर्थक सुरक्षा बलहरू मिसुराता र घार्यानतर्फबाट त्रिपोलीतर्फ सर्ने प्रयासमा रहेको भनिएको छ । यद्यपि, लिबियाली अधिकारीहरूले यी गतिविधिहरूलाई ‘सामान्य सैन्य अभ्यास’ को रूपमा व्याख्या गरेका छन् ।
लिबिया सन् २०११ मा तत्कालीन शासक मोअम्मर गद्दाफीको शासन समाप्तिपछि राजनीतिक अस्थिरता र विभाजनको सामना गर्दै आएको छ । देश हाल दुईवटा मुख्य प्रशासनमा विभाजित छ । त्रिपोलीस्थित संयुक्त राष्ट्र मान्यताप्राप्त सरकार, र पूर्वस्थित अर्को प्रशासन जसलाई खलिफा हाफ्तार नेतृत्वको लिबियाली राष्ट्रिय सेनाले समर्थन गर्दै आएको छ ।
राजधानी त्रिपोलीमा पछिल्ला महिनाहरूमा पटक–पटक हिंसात्मक घटना देखिएको छ । विशेषगरी, मे महिनामा भएको झडपपछि संयुक्त राष्ट्र मिसन र राष्ट्रपतिको नेतृत्वमा रहेको परिषद्बीच मिलेर एक युद्धविराम समितिको गठन गरिएको थियो, जसले दीर्घकालीन स्थायित्वका लागि पहल गरिरहेको छ ।
