काठमाडौँ।धार्मिक पर्यटनका लागि सञ्चालनमा ल्याइएको भैरहवास्थित गौतम बुद्ध अन्तर्राष्ट्रिय विमानस्थल पाँच महिनादेखि अन्तर्राष्ट्रिय उडानविहीन बनेको छ। टर्मिनल सुनसान, धावनमार्ग खाली र व्यापार सुस्त भएपछि पर्यटन उद्योग र लगानीकर्ताको मनोबल खस्किएको छ।
गत वर्ष असोज–कात्तिकमा कुवेत जजिरा एयरवेज, फ्लाई दुबई, थाई एयर एसिया, कतार एयरवेज र नेपाल एयरलाइन्सले केही महिनाका लागि उडान सञ्चालन गर्दा होटेल–रेस्टुरेन्टदेखि ट्याक्सी व्यवसाय फस्टाएको थियो। तर उडान स्थायी नभएकाले अहिले विमानस्थल र होटेल दुवै सुनसान छन्।
निजी क्षेत्रले विमानस्थल सञ्चालनका लागि सङ्घर्ष समिति गठन गरेको छ। शनिबार संस्कृति, पर्यटन तथा नागरिक उड्डयन मन्त्री बद्रीप्रसाद पाण्डेको उपस्थितिमा कार्यक्रम आयोजना गरी नियमित अन्तर्राष्ट्रिय उडान सुरु गर्न आग्रह गरिएको थियो।
दुई वर्षमा मात्र ४२ अन्तर्राष्ट्रिय उडान
पोखरा अन्तर्राष्ट्रिय विमानस्थल २२ अर्ब लागतमा निर्माण भए पनि अहिलेसम्म ४२ वटा अन्तर्राष्ट्रिय उडान मात्रै भएका छन्। आन्तरिक उडान बाहेक यहाँ नियमित अन्तर्राष्ट्रिय सेवा सीमित छ। सन् २०२३ देखि २०२५ सम्म पोखराबाट १३ चार्टर उडान सञ्चालन भएका छन्।
विमानस्थल सञ्चालन भएपछि पनि यात्रु संख्या कम रहेको छ। सिचुवान र हिमालयन एयरलाइन्सद्वारा सञ्चालन भएका चार्टर उडानमा मात्रै हजारौं यात्रु यात्रा गरेका छन्।
निजी क्षेत्रका व्यवसायी, पर्यटन उद्योग र विमानस्थल प्रशासनले नियमित अन्तर्राष्ट्रिय उडान सुरु गर्न दबाब दिइरहेका छन्।
