नयाँ दिल्ली– जी–२० शिखर सम्मेलन भारतको राजधानी नयाँदिल्लीमा शुरु भएको छ । भारतीय प्रधानमन्त्री नरेन्द्र मोदीले सबै विशिष्ठ अतिथिहरुलाई स्वागत गरेका छन् । दिल्लीको मन्डपममा कार्यक्रम चलिरहेको छ ।
भारतीय प्रधानमन्त्री मोदीले जर्मनीका चान्सलर ओलाफ शोल्ज, साउदी अरेबियाका राजकुमार मोहम्मद बिन सलमान, अमेरिकी राष्ट्रपति जो बाइडेन, बेलायती प्रधानमन्त्री ऋषि सुनक, इटालीकी प्रधानमन्त्री जार्जिया मेलोनी लगायतलाई स्वागत गरे ।
हिजो आइपुगेका बाइडेनसँग हिजै मोदीसँग कुराकानी भएको थियो । बाइडेन एयरपोर्टबाट सिधै मोदीलाई भेट्न उनको सरकारी आवासमा पुगेका थिए ।
दुवैबीच करिब एक घण्टा छलफल भएको थियो । सो क्रममा रक्षा र अन्तरिक्षका सम्बन्धमा छलफल गरेका थिए ।
बाइडेनले चन्द्रयान ३ को सफलताका लागि मोदीलाई बधाईसमेत दिएका थिए ।
नयाँदिल्लीस्थित प्रगति मैदानमा युरोपेली सङ्घसहित १९ वटा विशाल अर्थतन्त्र भएका राष्ट्रको अन्तर सरकारी सङ्गठन जी २० शिखर सम्मेलन चलिरहेको छ । यो दुई दिनसम्म चल्नेछ ।
सम्मेलनमा चीन र रुसका राष्ट्रपतिको अनुपस्थिति रहेको भए पनि यसले केही फरक नपर्ने दाबीसमेत गरिएको छ ।
शिखर सम्मेलनको पूर्वसन्ध्यामा भारतीय प्रधानमन्त्री मोदीले मानव केन्द्रित विश्वविकासमा जोड दिएका छन् । उनले साझा भविष्यका निम्ति विश्वका सबै मानवबीच एकता हुनुपर्ने, विश्ववासी एक परिवारका रुपमा हातेमालो गर्दै साझा प्रगति र समृद्धि प्राप्तिका लागि अघिबढ्नुपर्नेमा जोड दिएका हुन् ।
प्रधानमन्त्री मोदीले आर्थिक एवं औद्योगिक रुपमा कम विकसित देशहरूलाई एकैस्थानमा उभ्याउने ‘ग्लोबल साउथ’ को अवधारणा तथा अफ्रिकाका विकासशील मुलुकका सीमान्तकृत आकाङ्क्षालाई मूल प्रवाहमा समाहित गर्न अपरिहार्य भएको विचार व्यक्त भारतका प्रधानमन्त्रीले दिगो विकासका लक्ष्य प्राप्तिमा भएका प्रगतिबारे जी २० शिखर सम्मेलनमा समीक्षा हुने र लक्ष्यहरूको अक्षरसः कार्यान्वयनका लागि कार्यदिशा निर्धारण गर्ने बताएका छन् ।
