पाटन औद्योगिक क्षेत्रभित्र रहेका उद्योगहरुले औद्योगिक क्षेत्र व्यवस्थापन लिमिटेडले बढाएको भाडा वृद्धिको बिरोध गरेका छन् ।
आज ललितपुरको पाटन औद्योगिक क्षेत्रमा सञ्चालित उद्योगहरुको संस्था कल्याण तथा सुरक्षा समितिले पत्रकार सम्मेलन गर्दै औद्योगिक क्षेत्र व्यवस्थापनले औद्योगिक क्षेत्रमा बढाएको ८०० प्रतिशत भाडा वृद्धि तत्काल फिर्ता लिन माग गर्दै बिरोधका कार्यक्रमहरु घोषणा गरेको हो ।
पाटन औद्योगिक क्षेत्र कल्याण तथा सुरक्षा समिति अध्यक्ष शैलेन्द्रलाल प्रधानले सरकारले १० वटा औद्योगिक क्षेत्रको भाडा वृद्धि गरी कमाइ खाने भाँडोको रुपमा प्रयोग गर्नका लागि नभएको बताउनु भयो ।
उहाँले अहिले औद्योगिक व्यवस्थापन औद्योगिक क्षेत्रको विकास र बिस्तार भन्दा पनि भाडा वृद्धि गरेर उद्योगीहरुलाई समस्या बनाउने काम गरेको भन्दै वृद्धि गरिएको भाडा तत्काल फिर्ता गर्न माग गर्नुभयो ।
उहाँले १० वटा औद्योगिक क्षेत्रमा भएका उद्योगमा ५० हजार श्रमिकले रोजगार पाएको बताउनु भयो । उहाँले सरकारले औद्योगिक व्यवसायीहरुका माग समयमै सम्बोधन नगरे मंसिर २५ गतेदेखि चरणवद्ध आन्दोलनको घोषणा गर्ने चेतावनी दिएको छ ।
अध्यक्ष प्रधानले ८०० प्रतिशत वृद्धि भएको भाडा तत्काल फिर्ता लिएर नेपाल औद्योगिक क्षेत्र महासंघलाई वार्तामा बोलाउन माग गर्नुभयो । उहाँले माग सम्बोधन नगरे मंसिर २५ गते कालो ब्यानर र कालो झण्डा प्रदर्शन गर्दै विरोध जनाउने चेतावनी दिनुभयो ।
