हातको सजावट तथा हातको आकर्षण बढाउनका लागि मेहन्दीको प्रयोगपरापूर्वकालदेखि नै प्रचलनमा रहेको पाइन्छ । आजकाल यसको प्रयोग केही कम भएको देखिन्छ । तैपनि मेहन्दीको प्रयोग गरी हातमा गरिएको हल्का चित्रकारीले हातलाई ज्यादै सुन्दर र आकर्षक बनाउँदछ । महेन्दी लगाउने प्रचलन विशेष गरी नेपाल र भारतमा रहेको पाइन्छ ।
जनजीवनमा मेहन्दीको विशेष महत्व छ । युवती तथा महिलाले यसको उपयोग शृङ्गार प्रशाधनका रुपमा गर्दछन् तथा हातमा सुन्दरता ल्याउँदछन् । मेहन्दीले सौन्दर्य वृद्धिका साथसाथै कतिपय कष्टहरुको निवारण पनि गर्दछ । शारीरिक स्वास्थ्यका लागि महेन्दी विशेष हितकर छ । विशेष चाडपर्व तथा संस्कारहरुमा महिलाले विशेष रुपले हातमा मेहन्द लगाएर हातको सजावट गर्दछन् ।
मेहन्दीलाई पिसेर नङमा लगाउनाले नङ मात्र हैन यसका जरा हुँदै पूरै शरीरमा शीतलता आउँदछ । मेहन्दी पिसेर लगाउनाले शरीरको जलन समाप्त हुन जान्छ । शिरको सेतो कपालमा मेहन्दी लगाउनाले यो अत्यन्त आकर्षक देखिन्छ तथा यसले दिमागलाई पनि शीतलता प्रदान गर्दछ ।
साभारः ‘नारी सौन्दर्यको विज्ञान’ पुस्तकबाट
