काठमाडौं। लण्डनस्थित नेपाली राजदूतावासले बेलायतको सिजनल भिसाबारे कुनै सूचना जारी नगरेको प्रष्टीकरण दिएको छ।
नेपाली दूतावासले बिहीबार सार्वजनिक गरेको सूचना अनुसार बेलायतको सिजनल भिसा बारे दूतावासले कुनै पहल र सूचना जारी गरेको छैन।
यसअघि पुस १८ गते दूतावासकै लेटर हेड, छाप र दस्तखत अनधिकृत रुपमा प्रयोग गरी ‘यूके सिजनल भिसा मिति परिवर्तन बारेमा’ शीर्षकसहित सूचना सार्वजनिक भएको थियो। त्यो सूचनाको भर नपर्न र उक्त सूचना दूतावासले जारी नगरेको बिहीबारको सूचनामा उल्लेख छ।
दूतावासले जारी गरेको सूचनामा भनिनएको छ, ‘बेलायतको सिजनल वर्कर भिसा सम्बन्धमा सन् २०२२का लागि अन्तर्वार्ताको मिति परिवर्तन भएको भनी यस राजदूताबासबाट जारी भएको भनी प्रचार गरिएको सूचना राजदूताबासबाट जारी नभएकाले यो झूटो सूचनालाई आधार मानी भिसा आवेदन नगर्न नगराउनुहुन अनुरोध छ।’
गलत सूचनालाई आधार मानेर वैदेशिक रोजगारीका लागि पहल गरी ठगिएमा दूतावास जवाफदेही नहुने पनि सूचनामा उल्लेख गरिएको छ।
पछिल्लो समय बेलायतले कृषिमा काम गर्ने गरी सिजनल भिसा वितरण गरिरहेको भन्दै विभिन्न एजेन्सीबाट भिसा आवेदन दिनेको संख्या बढिरहेको छ।
