काठमाडौँ– हामी सबैले घडी लगाउने गरेका नै छौं । हामीले लगाउने घडीमा एक देखि बाह्रसम्म अङ्कहरु हुन्छन् । कहिलेकाहीँ २४ नम्बरहरु पनि हुन्छन् ।
विश्वमा एउटा यस्तो शहर छ, जहाँ घडीमा ११अंक हुन्छ तर त्यहाँ कहिल्यै १२ नै बज्दैन । के तपाईंलाई त्यो शहरको नाम थाहा छ ?
जुनसुकै देशका शहरहरुमा रहेका सार्वजनिक बाटो काट्ने ठाउँ, गिर्जाघर र घण्टाघरहरुमा घडी राखिएको हुन्छ । जसको मुख्य उद्देश्य नै आम मानिसलाई समयको जानकारी दिनु हुन्छ । यद्यपि तपार्इं त्यो शहरको नामबारे अनविज्ञ हुनुहुन्छ होला, जुन शहरको घडीमा १२ कहिल्यै बज्दैन ।
त्यो शहरको नाम सुन्दा तपाईं छक्क पर्नुहुनेछ । त्यो शहर दुनियाँकै सुन्दर देश स्विटजरल्याण्डमा छ । जुन शहरको नाम सोलोर्थन हो । जुन शहरका मानिसहरु ‘११’नम्बरप्रति यति क्रेजी छन् कि तिनिहरु आफ्नो घडीमा ‘१२’नम्बर नै राख्दैनन् ।
त्यसैले यस शहरका सबै घडीमा ११ सम्म मात्र नम्बरहरु हुन्छन् । त्यहाँका चर्च र गिर्जाघरमा राखिएका घडीहरुमा समेत ११ सम्म मात्र नम्बरहरु राखिएका हुन्छन् ।
सोलोर्थनस्थित टाउन स्क्वायरमा पनि घडी राखिएको छ । जसलाई शहरको पहिचानको रुपमा लिइन्छ । तर त्यहाँको घडीमा पनि कहिल्यै १२ बज्दैन । त्यहाँका मानिसहरुले ११ नम्बरलाई निकै रुचाउने भएकोले त्यहाँका पुराना स्थल, सङ्ग्रहालय, टावरमा पनि घडीमा ११ नम्बरहरुसम्म मात्र हुन्छन् ।
यतिसम्म कि त्यहाँको मुख्य मानिएको उर्सूस चर्चमा राखिएको घडीमा समेत १२ बज्दैन । यसबाट त्यो शहरमा ११ नम्बरको महत्व कतिसम्म छ भन्ने कुरा अनुमान लगाउन सकिन्छ । जुन चर्चलाई बनाउन ११ वर्ष लागेको थियो । चर्चमा ११÷११ वटा झ्याल र ढोकाहरु छन् । अर्को चाखलाग्दो कुरा के छ भने त्यहाँका अधिकांश मानिसहरु ११ तारिखमा नै आफ्नो जन्मदिन मनाउँछन् ।
मानिसहरुले दिइने उपहारमा समेत ११ नै नम्बर जोडिन्छ । आखिर ११ नम्बरप्रति त्यहाँका मानिसहरुमा किन यति धेरै क्रेज र प्रेम छ ? जुन क्रेज र प्रेम अहिलेदेखि मात्र नभएर सदिऔंदेखि चलिआएको थियो । त्यहाँको एक लोककथाका अनुसार सोलोर्थनका मानिसहरु निकै मेहनत गर्थे ।
तर मेहनत गरेर पनि त्यहाँका मानिसहरु खुसी र सुखी थिएनन् । त्यही समयमा शहरको पहाडबाट एक ‘एल्फ(सानो प्राणी)’ आए र उनैले शहरका मानिसहरुको हौसला बढाउन शुरु गरे । यसले गर्दा त्यहाँका मानिसहरुको जीवनमा खुसी छाउन थाल्यो । उनको साथमा अलौकिक शक्ति थियो ।
जर्मन भाषामा एल्फको अर्थ ११ हुन्छ । त्यसकारण सोलोर्थनका मानिसहरुले हरेक काममा ११ नम्बर जोड्न थाले । फलतः घडीमा पनि ११ सम्मका अंकहरु मात्र राखे ।
