काठमाडौं । स्थानीय तहमा रिक्त विभिन्न ४१ पदका लागि मतदान भइरहेको छ । नगरपालिका प्रमुख एक, उपप्रमुख एक, गाउँपालिका अध्यक्ष दुई, उपाध्यक्ष चार र वडाध्यक्ष ३३ गरी ४१ पदका लागि मतदान भइरहेको हो ।
निर्वाचन आयोगका प्रवक्ता नीता पोख्रेल अर्यालका अनुसार अपराह्न ५ः०० बजेसम्म मतदानमा दुई लाख २६ हजार सात सय ९९ जनाले मताधिकार प्रयोग गर्नेछन् । यो उपनिर्वाचनमा विभिन्न २० राजनीतिक दल र स्वतन्त्र गरी तीन सय ७६ उम्मेदवार प्रतिस्पर्धामा छन् । निर्वाचन आयोगले उपनिर्वाचनको मतपरिणाम दुई दिनभित्र सार्वजनिक गर्ने योजना बनाएको छ ।
प्रमुख निर्वाचन आयुक्त दिनेशकुमार थपलियाले मंसिर १७ गतेभित्रै मतपरिणाम सार्वजनिक गर्ने गरी तयारी गरिएको बताए । ‘१७ गतेभित्रमा सबै नतिजा प्रकाशन गर्ने गरी आवश्यक तयारी गर्न लगाइएको छ । राजनीतिक दलका उमेदवारका प्रतिनिधिलगायत सबैले सहयोग गरिदिए समयमा नै मतगणना सकिन्छ,’ उनले भने ।
आयोगले एउटा मात्रै केन्द्र रहेको वडामा मतदानलगत्तै मतगणना गर्ने व्यवस्था मिलाउन निर्देशन दिएको छ । ‘एउटा मात्रै मतदान केन्द्र रहेका वडामा मतदान सकिनासाथ मतपेटिका अन्यत्र ढुवानी नगरी सोही स्थानमा गणना गर्ने व्यवस्था गर्नू भनेका छौँ,’ थपलियाले भने ।
वडामा एकभन्दा बढी मतदान केन्द्र छन् भने मतपेटिका एकै ठाउँमा ल्याउनुपर्ने उनले बताए । ‘काठमाडौं महानगरपालिकाको १६ नम्बर र कीर्तिपुरका दुई बाहेकका वडाको परिणाम सोही दिन (राति १२ बजे)सम्म नतिजा निकाल्ने गरी तयारी गर्नू भनेका छौँ,’ उनले भने ।
उपनिर्वाचन हुन लागेका स्थानका प्रमुख र उप्रमुखको हकमा १७ गते राति १२ बजेसम्ममा मतपरिणाम सार्वजनिक गर्ने गरी व्यवस्था मिलाइएको थपलियाले बताए । ‘गणना टोली, आवश्यक पर्ने रिसोर्स र सुरक्षाको व्यवस्था मिलाएका छौँ,’ उनले भने, ‘एकभन्दा बढी वडा छन् भने जहाँ पालिकाको केन्द्र छ, त्यहीँ मतगणना हुनेछ । पालिका प्रमुख र उपप्रमुखको गणना १७ गते रातिसम्ममा सकिनेछ ।’
मत परिणाम वेबसाइटमा
तह उपनिर्वाचनको मतगणनाको अद्यावधिक परिणाम निर्वाचन आयोगले आफ्नो वेबसाइटमार्फत अद्यावधिक गर्ने भएको छ । आयोगका अनुसार मतदान सम्पन्न भएर गणना सुरु भएपछि निरन्तर अद्यावधिक गरिने छ ।
आयोगका प्रवक्ता नीता पोखरेल अर्यालले गणना सुरु भएपछि आयोगले आफ्नै संयन्त्रमार्फत अद्यावधिक गर्ने बताइन् । उनकाअनुसार छिटोछरितो र अद्यावधिक निरन्तर गर्ने कार्यलाई प्रभावकारी बनाउन गणनामा खटिने जनशक्ति र अद्यावधिक गर्ने जनशक्तिलाई प्रशिक्षण दिइएको छ ।
आयोगका अनुसार रिजल्ट डट इलेक्सन डट जिओभी डट एनपी’ मार्फत मतगणनाको परिणाम अद्यावधिक गरिने छ ।
