मधेशमा चिनियाँ कम्पनीले गैरकानूनी खोला उत्खनन् गरिरहेको भन्दै सर्वोच्चमा रिट दर्ता भएको छ ।
मधेश प्रदेशको पूर्वपश्चिम राजमार्ग अन्तर्गत धनुषाको कमलादेखि सप्तरीको कंचनरुपसम्मको सडक चार लेनमा विस्तार तथा स्तरोन्नतीको लागि आवश्यक पर्ने संरक्षित वन क्षेत्र र नदीबाट गैरकानूनी तथा अवैध रुपमा चिनियाँ कम्पनीले ढुंगा, गिटी, बालुवा उत्खनन गरिरहेको भन्दै अदालतमा मुद्धा दायर भएको हो । सोही मुद्धा आगामी १६ गतेलाई पेशी तोकिएको छ ।
लहान नगरपालिकाले नगरपालिकाको संक्षिप्त वातावरणीय अध्ययन तथा प्रारम्भिक वातावरणीय परिक्षण कार्यविधि, २०७९ अनुसार प्रारम्भिक वातावरणीय परिक्षणमा आफै प्रस्तावक भई आफै स्वीकृत गरेको अवस्था देखिएको र नगरपालिका र चाइना रेल्बे नं २ इन्जीनयरिङ ग्रुप को लिमिटेडले गिट्टी बालुवा उत्खन्न र निकासी गर्दै आएका छन् ।
रिटमा गैरकानूनी तथा अवैध रुपमा गिट्टी बालुवा निकासी गर्ने कार्य गरी रहेकोले वातावरण संरक्षण ऐन, २०७६ को दफा २९ र विपरित वातावरणीय क्षति पुग्न सक्ने देखिएकोले यस रिट निवेदनको अन्तिम किनारा नभएसम्म रिट निवेदनमा उल्लेख भएको खुट्टी खोलाबाट गैरकानूनी रुपमा ढुङ्गा, बालुवा उत्खनन नगर्नु नगराउनु, गैरकानूनी रुपमा उत्खनन र संकलन गरिएका ढुङ्गा, बालुवा निकासी नगर्नु नगराउनु, उक्त कार्यहरु तत्काल बन्द गर्नु, गराउनु, वातावरण संरक्षण गर्नु भनी विपक्षीको नाममा सर्वोच्च अदालत नियमावली, २०७४ को नियम ४९ बमोजिम अन्तरिम आदेश जारी गर्न माग गरिएको छ ।
वातावरण संरक्षण ऐन, २०७६ को दफा ३ तथा वातावरण संरक्षण नियमावली, २०७७ तथा मधेश प्रदेशको प्रदेश वन ऐन, २०७७ लगायतका संघीय तथा प्रदेश कानूनको विपरित हुने गरी लहान नगरपालिकाले बनाएको संक्षिप्त वातावरणीय अध्ययन तथा प्रारम्भिक वातावरणीय परिक्षणलाई समेत बदर गर्न रिटमा माग गरिएको छ ।
