चीन मानव तस्करीको व्यापक व्यापारका लागि बिश्वभरि नै परिचित छ, तर अब यो मानव तस्करको चीनको सञ्जाल चीन बाहिर पनि धेरै सक्रिय भइसकेको छ । चिनियाँ मानव तस्करहरूले हालैका वर्षहरूमा चीन बाहिर आफ्नो सञ्जाल विस्तार गरेका तथ्यहरु बिभिन्न अनुसन्धान र समाचार रिपोर्टहरू प्रकट गरेका छन्। तस्करहरूले गरिब एसियाली राष्ट्रका मानिसहरूलाई रोजगारीको नाममा चीनमा बसाइँ सर्ने प्रलोभन दिएर बेच्ने वा ठगेर जबरजस्ती विवाह वा वेश्यावृत्ति वा दासत्व र अन्य प्रकारका गैरकानूनी गतिविधिका लागि बेच्ने गरेको पाइएको छ। चीनमा यस्ता बेचबिखन भएका मानिसहरूलाई अंग तस्करका लागि मारिने डरलाग्दो दाबीहरू पनि छन्।
यस विषयको पछिल्लो घटनाक्रम नेपालबाट आएको छ जहाँ स्थानीय अधिकारीहरूले दुई चिनियाँ नागरिकलाई पक्राउ गरेका छन्। पक्राउ परेका यी चिनियाँ नागरिकहरूले १० जना नेपालीलाई राम्रो काम दिने वाचा गरेका थिए तर पछि ति नेपालीहरु लाई चीनमा अवैध काम गर्न बाध्य पारिएका थिए। नेपाल मानव बेचबिखन अनुसन्धान ब्यूरोका प्रहरी उपरीक्षक शारदाप्रसाद चौधरीले उद्धार गरिएका महिला तथा युवतीहरूको अनुसन्धानले नेपालबाट बेहुलीका रूपमा चीन लैजाने अधिकांश युवतीलाई वेश्यावृत्तिमा लगाइने गरेको देखिएको बताएका छन् । सन् २०१९ मा पनि नेपाल प्रहरीले बिहेको बहानामा नेपाली युवतीहरूलाई चीनमा बेचबिखन गरेको आरोपमा १० जनालाई पक्राउ गरे पनि यथार्थमा उनीहरूलाई घरेलु कामदार र यौनदासीका रूपमा प्रयोग गरेको तथ्य आएको थियो। चीनमा तस्करीमा परेका नेपालीको चीनस्थित नेपाली दूतावासले पटक–पटक उद्धार गरेको छ ।
चिनियाँ तस्करहरू प्रायः सरकारी राडारबाट उम्कन्छन् किनभने तिनीहरू नियमहरू तोड्न र प्रक्रियाहरू पन्छाउन खप्पीस हुन्छन् । अधिकांश चिनियाँ नागरिकहरूले सबै कानुनी प्रक्रियाहरू पालना गरेर नेपाली महिलाहरूलाई चीन लैजाने भएपनि यी महिलाहरू यौन दासी वा बेतलबी कामदारको रूपमा प्रयोग हुने उच्च जोखिममा भएको महिला तथा बालबालिका बेचबिखन विरुद्धको गठबन्धनको अध्यक्ष डा अञ्जना शाक्य बताउनुहुन्छ ।
चिनियाँ तस्करहरूले विभिन्न देशमा चीनले निर्माण गरिरहेको पूर्वाधार परियोजनाका व्यवसायी वा कामदार भनी अवैध मानव व्यापार गर्छन्। चीन-पाकिस्तान आर्थिक करिडोर (CPEC) अन्तर्गतका परियोजनाहरू कार्यान्वयन गर्दा धेरै चिनियाँ नागरिकहरू नियमित रूपमा पाकिस्तान आउने गरेको देखिन्छ। गरिब र अल्पसंख्यक पृष्ठभूमिका केटीहरू र चिनियाँ पुरुषहरूबीच ठगी विवाह गरेर बेहुली बेचबिखनका धेरै घटनाहरू रिपोर्ट गरिएका छन्।
यी चिनियाँ तस्करहरू अस्तित्वमा नभएका कम्पनीहरूको व्यवसायीको रूपमा पाकिस्तान प्रवेश गरेका थिए। ब्रुकिङ्स इन्स्टिच्युटको रिपोर्टअनुसार चिनियाँ तस्करहरू ले गरिब पाकिस्तानी केटीहरूलाई ३,५००-५,००० अमेरिकी डलरमा किनबेच गरेका थिए ।
