पोखरा, १ पुस । पोखराको पर्यटकीय काहूँडाँडालाई पर्यटकीय केन्द्रको रुपमा विकास गरिने भएको छ । काँहूडाँडामा करोडौं रुपैयाँको लगानीमा धर्मकाया वुद्धमण्डला निर्माणसँगै यो क्षेत्र पर्यटकीय केन्द्र बन्ने विश्वास गरिएको हो । उक्त क्षेत्रलाई पर्यटकीय केन्द्रको रुपमा विकास गर्न योजनासहित गठित धर्मकाया बुद्धमण्डला विकास तथा व्यवस्थापन समितिको सम्पन्न सातौं वार्षिक साधारणसभाले यस्तो निर्णय गरेको हो ।
पोखरा ३ नदिपुरस्थित धर्मशीला बुद्ध बिहारमा आयोजित साधारणसभाको प्रमुख अतिथि समितिका सल्लाहकार शंकर गुरुङ र विहारका भिक्षु धजवन्तले काहूँडाँडामा योजनासहितको विकासमा जोड दिएका हुन् । उक्त कार्यक्रममा प्रमुख अतिथि शंकर गुरुङ, सल्लाहकारहरु तीर्थ श्रेष्ठ, बिलबहादुर गुरुङ र कर्णेल राजकाजी गुरुङले शुभकामना व्यक्त गरेका थिए । समितिका सचिव पुर्ण लामा र कोषाध्यक्ष श्याम शाक्यले प्रस्तुत गर्नुभएको वार्षिक र आर्थिक प्रतिवेदन साधारणसभाले पारित गरेको थियो।
धर्मकाया बुद्ध मण्डला विकास तथा व्यवस्थापन समितिका अध्यक्ष रुद्रकुमारी(मैना) गुरुङको अध्यक्षतामा भएको कार्यक्रममा विभिन्न क्षेत्रबाट सम्मानित र निर्वाचित समितिका पदाधिकारी एवम सदस्यहरुलाई बधाई ज्ञापन गरिएको थियो भने उपाध्यक्ष भरतराज शाक्यले स्वागत र सचिव पुर्ण लामाले कार्यक्रम सञ्चालन गरेका थिए ।
