काठमाडौं । नेपालगञ्जको काँरकाँदो चोकमा ट्राफिक प्रहरीले एक जना सर्वसाधारणलाई निर्घात् कुटपिट गरेका छन् । बिहान साढे ८ बजे हेटौंडा उपमहानगरपालिका १७ घर भई जुम्लामा डोजर चलाउँदै आएका देवराज सापकोटालाई ट्राफिकका प्रहरी सहायक निरीक्षक प्रकाश विकले कुटेका हुन् ।
व्यक्तिगत प्रयोजनका लागि बाटोमा भिडियो खिचिरहेका सापकोटालाई ट्राफिक नियम उल्लंघन गर्दै मोटरसाइकलमा आएका प्रहरी सहायक निरीक्षक विकले आफ्नो भिडियो खिचेको भन्दै मोबाइल नियन्त्रणमा लिएर सबै भिडियोहरु डिलिट गरेका थिए । सापकोटले आफू डोजरको पम्प बनाउन नेपालगञ्ज आएको बताए ।
सापकोटाले व्यक्तिगत प्रयोजनका लागि भिडियो खिचेको जानकारी गराउँदा पनि ट्राफिक प्रहरीले नियन्त्रणमा लिई काँरकाँदौबाट बसपार्कस्थित विद्युत प्राधिकरणमा रहेको अस्थाई प्रहरी बिटमा लगेर कुटपिट गरेका हुन् । प्रहरीले उनको सवारी चालक अनुमति पत्रसमेत बरामद गरेका छन् ।
आफु मुटु रोगी भएका पीडित सापकोटाको शरिरमा प्रहर्ीको कुटपिटबाट निलडाम समेत परेको छ । जिल्ला प्रहरी कार्यालय बाँकेका प्रवक्ता नारायण डाँगीले सत्य, तथ्य बुझेपछि आवश्यक कारबाही गरिने बताएका छन् ।
