न्यायाधीश नरेशकुमार चौधरी र श्रीधराकुमारी पुडासैनीको इजलासले प्रतिवादी गिरीलाई अदालतमा उपस्थित हुने गरी झिकाउने आदेश भएको अदालतका सूचना अधिकारी युवराज पौडेलले जानकारी दिएका छन् । पौडेलका अनुसार शुक्रबार अदालतले पत्र काटिसकेको छ । गिरीले १५ दिनभित्र पत्र बुझ्नुपर्ने उनले बताएका छन् । ३० दिनभित्र गिरी अदालतमा उपस्थित हुनुपर्ने आदेश भएको उनले जानकारी दिए ।
यसअघि सुनसरी अदालतले आरोपित गिरीलाई सफाइ दिएको थियो । महिला अनुयायीमाथि बलात्कारको आरोप लागेका उनलाई जिल्ला अदालत सुनसरीले गत वर्ष भदौ २७ मा सफाइ दिएको थियो । अदालतले उनलाई दोस्रो पटक सफाइ दिएको हो । त्यसअघि उक्त मुद्दामा २०७७ साल मंसिर २२ गते जिल्ला अदालत सुनसरीका तत्कालीन न्यायाधीश अर्जुनप्रसाद कोइरालाको इजलासले गिरीलाई पहिलो पटक सफाइ दिएको थियो ।
तर उच्च अदालतले पुनः प्रमाण बुझी फैसला गर्न आदेश दिएर मुद्दा सुनसरी अदालतमा पठाएपछि न्यायाधीश कोइरालाको इजलासले २७ भदौ २०८० मा सफाइ दिएको थियो । अदालतमा गिरीको महिला अनुयायीसँगको अडियो संवादलाई प्रमाणको रुपमा पेश गरिएको थियो । तर मुख्य प्रमाणको रुपमा पेश भएको सो ‘अडियो रेकर्ड’ परीक्षण गर्ने व्यक्तिको योग्यता नै नपुगेको उल्लेख गर्दै गिरीलाई सफाइ दिने फैसला अदालत गरेको थियो । त्यसपछि सरकारी वकिलको कार्यालयले जिल्लाको फैसलाविरुद्ध उच्च अदालत गएको थियो । सिद्धबाबाका रुपमा चर्चित गिरीविरुद्ध २०७६ साल कार्तिक ४ गते महिला अनुयायीले जबरजस्ती गरेको दाबीसहित प्रहरीमा जोहरी दिएकी थिइन् ।
