काठमाडौं । त्रिभुवन अन्तर्राष्ट्रिय विमानस्थलबाट ८५० ग्राम सुन बरामद भएको छ । शुक्रबार दिउँसो करिब २ बजे विमानस्थलको आगमन टनेल गेटबाट सुन बरामद भएको हो ।भारतीय महिला सहिना प्रभिनले प्लाष्टिकभित्र राखेर सुन नेपाल ल्याएकी थिइन् ।
यस्तै बिहीबार राती पनि त्रिभुवन अन्तर्राष्ट्रिय विमानस्थलबाट एक किलो सुन बरामद दिल्लीबाट बुधबार आएको इन्डिगो एयरलाइन्सको सिटमा १ किलो ७० ग्राम सुन बरामद भएको थियो । विमान अवतरण हुने बित्तिकै प्रहरीले नियमित जाँच गर्ने क्रममा उक्त परिमाणको सुन भेटिएको विमानस्थलका एसएसपी कृष्णहरि शर्मा पोखरेलले जानकारी दिए ।
फ्लाइट नम्बर ६ई११५१ नम्बरको इन्डिगो एयरलाइन्सको सिट नम्बर २७ चार्लीको पछाडि र २८ चार्लीको अगाडिको सिट पाकेटको तल बेवारिसे अवस्थामा रहेका झोलाबाट उक्त सुन बरामद गरिएको प्रहरीले जनाएको छ ।
त्रिभुवन विमानस्थल प्रहरीका अनुसार कालो र सेतो रङको टेपले बेरिएको अवस्थामा सुन बरामद भएको थियो । जसमा ३ थान सिक्री, ६ थान बिस्कुट, त्रिभूज आकारको सुनको टुक्रा २ थान र सिक्री जोड्ने साना रिङ गरी १ किलो ७० ग्राम बराबरको सुन बरामद भएको हो । पछिल्लो समय त्रिभुवन बिमानस्थलको चेकजाँचलाई कडाईका साथ हेरिएपनि विभिन्न देशबाट अवैधानिक रुपमा सुन नेपाल ल्याउने क्रम बढेको छ ।
