नयाँ समीकरण बन्दा अन्तिमसम्म पनि भागवण्डामा सम्माजनक अवस्था हुनुपर्ने माग गर्दै आएको माधव नेपाल नेतृत्वको नेकपा एकीकृत समाजवादी अहिले भित्तामा पुगेको छ । अन्तिम समयमा समीकरणमा सहभागी हुदै गर्दा एकीकृत समाजवादीले राष्ट्रियसभाको उपाध्यक्ष, प्रदेशको नेतृत्व, प्रधानमन्त्री पद लगायतका प्रस्ताव अघि सार्दै खोजेको भाग नपाए सरकारबाट बाहिरिने धम्की दिदै आएको छ । तर समाजवादीका घु¥र्याइलाई शीर्ष दलहरुले बेवास्ता गर्दै माधवको पार्टीलाई पेल्दै अघि बढेका छन् ।
सत्ता सञ्चालनका क्रममा सुरुमा चार दलको मात्र समीकरण बन्दा राष्ट्रिय सभाको उपाध्यक्ष एमालेले पाउने लिखित सहमति भएको थियो तर पछि सत्ता समीकरणमा माधव नेपाल नेतृत्वको पार्टी पनि सामेल भएपछि उपाध्यक्षको पद एमालेले पाउने भन्ने सहमतिको बुँदा हटाइएपछि एकीकृत समाजवादी उपाध्यक्ष आफूले पाउनेमा आशावादी थियो । तर उपाध्यक्षमा आफ्नो दाबी कायमै राखेको एमालेले एकीकृत समाजवादीका ढिपीका बिच माधव नेपाललाई बाइपास गर्दै एमालेले उपाध्यक्ष पद हत्याएको छ ।
सत्ता समीकरणमा सहभागी शीर्ष दलहरुले माधवको पार्टीलाई हल्का रुपमा लिदै आएका छन् । राष्ट्रियसभाको उपाध्यक्ष नपाएको एकीकृत समाजवादीले यता प्रदेशको मुख्यमन्त्री पाउनेमा समेत आशंका छ । सात मध्ये एउटा प्रदेशको मुख्यमन्त्री पाउनुपर्ने अडान राखेको समाजवादीलाई सुदुरपश्चिम प्रदेशको मुख्यमन्त्री दिने दलहरुबिच छलफल भएपनि नागरीक उन्मुक्ति पार्टी पनि सुदुरपश्चिम प्रदेशको नेतृत्व गर्ने होडमा छ । समीकरणमा आफ्नो पार्टीलाई अन्डरइस्टिमेट गर्न खोजिएको र यसको संकेत राम्रो नहुने पार्टीका नेताहरुको भनाइ छ ।
पाँच दलीय सत्ता समीकरणमा एकीकृत समाजवादी पेलिदै गएको छ । समीकरणको ठूलो दलको हैसियतमा रहेको एमालेले एकीकृत समाजवादीलाई पेल्दै आएको छ । राष्ट्रियसभा र प्रदेशको नेतृत्व मात्र होइन, उपचुनावमा समेत एमालेले एकीकृत समाजवादीलाई एक्लै पारेको छ । कांग्रेसले प्रतिपक्षी गठबन्धनमा समेट् खोज्दा सत्ता समीकरणमा सहभाग भएको एकीकृत समाजवादी अहिले अप्ठेरोमा परेको छ ।
यद्यपी, नेकपा एमालेका नेताहरु भने समीकरणभित्र सबै दललाई आत्मसम्मान हुने गरी स्पेस दिएर अघि बढ्ने मामिलामा कुनै समस्या नरहेको बताउदै आएका छन् । एकीकृत समाजवादीका विषयमा शीर्ष नेताहरुबिच छलफल भएको नेताहरुको भनाइ छ । समीकरणमा सहभागी भएको सुरुवाती दिनदेखि नै एकीकृत समाजवादीले विभिन्न मागहरु राख्दै आएको छ । तर उधारो सहमतिको मारमा माधव नेपाल र उसको पार्टी एकीकृत समाजवादी परेको छ ।
