अजय देवगन स्टारर बलिउड फिल्म ‘शैतान’ले आक्रामक व्यापार गरेको छ। गत शुक्रबारबाट रिलिज भएको यस फिल्मले घरेलु बक्सअफिसमा तीनदिनमा ५५ करोड भारतीय रुपैयाँ बढी कलेक्सन गरेको हो।
ठूला मल्टिप्लेक्स हलदेखि सिंगल थिएटरमा पनि राम्रो व्यापार गरिरहेको भारतीय मिडियाले उल्लेख गरेका छन्। साथै हलहरुमा अकुपेन्चीमा समेत वृद्धि भइरहेको छ।
प्रदर्शनको पहिलो दिन यस फिल्मले १५.२१ करोड भारुको ओपनिङ गरेको थियो। त्यसैगरि, शनिबार १९.१८ करोड कमाउँदा आइतबार २०.५ करोड भारु कलेक्सन गरेको छ। विश्वभर भने फिल्मले ७९ करोड भारु कमाइ सकेको छ।
अजयकै लगानीमा निर्माण भएको बलिउड फिल्म ‘शैतान’ अलौकिक हरर थ्रिलर जनरामा बनेको हो। विकास बहल निर्देशित यस फिल्ममा अजयसहित माधवन र ज्योतिकाको मुख्य भूमिका छ।
यो फिल्म गत वर्ष फेब्रुअरीमा रिलिज भएको गुजराती फिल्म ‘वश’को रिमेक हो। यो फिल्मको कथा असल र खराबबीचको लडाइँमा आधारित छ।
