बच्चालाई सानैदेखि राम्रो बानीको विकास गर्न सके त्यो बच्चा जीवनमा सफल हुन्छ । हुन पनि बालबालिका भनेका काँचो माटो हुन् । काँचो माटोलाई परिमार्जन गर्दै कुमालेले विभिन्न आकृतिका भाँडाकुँडा बनाएजस्तै बालबालिकालाई पनि विभिन्न ज्ञान र सीप सकाउन सकिन्छ ।
कतिपय कुराहरु बच्चा आफैले भोगेर सिक्छन् । कतिपय कुराहरु आमाबुवाले नै सिकाउनुपर्ने हुन्छ । कतिपय पढेर र धेरै कुरा ठूलो भएपछि आफै सिक्छन् । तर उनीहरुको सफलताका लागि अभिभावकले ध्यान दिएर सिकाउनुपर्ने केही कुराहरु यस्ता छन्—
– सबैभन्दा पहिला बच्चालाई आफुभन्दा ठूलाको आदर, सम्मान, शिष्टचार सानालाई मायामता गर्न सिकाउनुपर्छ ।
– बच्चालाई धैर्य र मेहनतले नै सबै काम बन्छ भनेर सिकाउनुपर्छ । यसो भए सफलताका लागि धैर्यता गर्न सिक्छन् र पाउँछन् ।
– बच्चालाई सही र गलतको फरक छुट्याउन सिकाउनुपर्छ । सही र गलत थाहा भएपछि मात्र उनीहरुमा निर्णय लिने क्षमता बढ्छ ।
– बच्चाहरुमा अरुलाई सहयोग गर्नुपर्छ भन्ने भावनाको विकास गराउनुपर्छ । चिनेकाहरुको मात्र नभएर आवश्यक परेको मानिस सबैलाई सहयोग गर्नुपर्छ भन्ने कुरा सिकाउनुपर्छ ।
– बच्चालाई कुनै पनि वस्तु वा सुविधा तिम्रो मात्रै होइन अरुसँग बाड्ने बानी गर्नुपर्छ भनेर सिकाउँदा बच्चाले अरुको भावना र आवश्यकताको पनि ख्याल राख्न सिक्छ ।
– बच्चालाई काम प्रति जहिले पनि इमानदार भई समयमै गर्नुपर्छ भन्ने सिकाउनुपर्छ । उनीहरुलाई हरेक काम लापरबाही नगरी परर्फेक्ट गर्न र झुट बोल्नु हुन्न भन्ने सिकाउनुपर्छ ।
– बच्चालाई जहिले पनि ठूलाले भनेको कुरा मान्नुपर्छ, ठूलोले केही कुरा भनेको तिम्रो हक र हितकै लागि हो भनेर सिकाउनुपर्छ ।
– बच्चाहरुलाई हरेक दिन प्राथना गर्नुपर्छ भनेर सिकाउँदा यसबाट बच्चामा सकारात्मक विचार र एकाग्रतामा सुधार आउँछ ।
